"Görünür, Rusiya son vaxtlar Ermənistana milyardlarla dollar dəyərə malik silahlar bağışlamaqla İrəvanı Bakının ayağına vermək istəmir".

Unikal.org xəbər verir ki, bu sözləri axar.az-a açıqlamasında millət vəkili, politoloq Rasim Musabəyov deyib. Deputat Rusiyanın açıq siyasət apardığını vurğulayıb:
"Azərbaycan Rusiyanın tərəfdaşı, Ermənistan isə tulasıdır. Görünür, Rusiya son vaxtlar yürütdüyü siyasətlə Ermənistanı bizim ayağımıza vermək istəmir. Moskva hazırda Azərbaycana silah satır, ancaq Ermənistanı da boş buraxmır. Bu, birbaşa Rusiyanın imperiya siyasətdir. Ona görə də buna təəccüblənməyə dəyməz. Rusiya tək Ermənistana deyil, İsrail, Misir və İordaniyaya da silah bağışlayıb. Düzdür, Rusiya ATƏT Minsk Qrupunun üzvüdür və Dağlıq Qarabağ məsələsində həlledici sözə malikdir. Ancaq ABŞ da Minsk Qrupunun üzvü kimi vaxtilə Misirlə İsraili barışdıran ölkə idi".
Millət vəkili qeyd edib ki, Rusiyanın bu siyasəti özü üçün təhlikəlidir:
"Ermənistanın bu qədər sürətlə militaristləşdirilməsi Rusiyanın özü üçün də təhlükəlidir. Əslində, bunu çox yaxşı bilən Moskva məhz balans yaratmaqla öz siyasətini açıq şəkildə ortaya qoyur. Bu açıq siyasət isə Azərbaycan və Ermənistanı müharibədən yayındırmaq və hər iki tərəfi özünə yaxın saxlamaqdan ibarətdir".
Qeyd edək ki, Ermənistan müstəqilliyinin 25 illiyi münasibətilə İrəvanda keçirdiyi paradda T-72 tanklarını, tank əleyhinə özüyeriyən qurğular, "Qrad", "Tayfun", VM-80, "Smerç", "Konkurs" reaktiv yaylım atəş sistemləri, "Toçka U", "Skad" taktiki raket komplekslərini nümayiş etdirib.
S-125, Strela-10, "Buk", S-300 zenit raket kompleksləri də parada çıxarılan texnikalar arasında olub.
Paradda "İsgəndər" raket komplekslərinin nümayişi isə diqqətdən yayınmayıb.