Bəzən təcrübədə icra məmurları tərəfindən borcludan ilk növbədə 7 fazilik icra ödənişinin təmin edilməsi hallarına rast gəlinir. Yəni bu halda əsas məbləğ qalır kənarda və icra məmuru borcludan tutulmalı olan məbləğin 7 faizi miqdarında icra ödənişini müvafiq büdəcəyə köçürməsini və ya nəğd şəkildə verməsini tələb edir.
Hüquqşünas Əlibaba Əliyev Unikal.org-a açıqlamasında bildirib ki, Kredit borcuna dair məhkəmə qərarının icrası zamanı icra məmurları tərəfindən borcludan tutulan məbləğdən 7 faizlik icra ödənişinin ilkin olaraq təmin edilməsi qanunsuzdur: "Çünki, "İcra haqqında Azərbaycan Respublikasının 27 dekabr 2001-ci il tarixli Qanunun 74.1-ci maddəsinə əsasən icra məmuru tərəfindən borcludan tutulmuş, o cümlədən borclunun əmlakının satılmasından əldə olunmuş pul məbləğindən əvvəlcə tələbkarın (tələbkarların) tələblərinin təmin olunması üçün istifadə edilir. Göründüyü kimi qanunun birbaşa göstərişindən aydın olur ki, borcludan tutulmuş məbləğdən ilk növbədə tələbkarın tələblərinin təmin edilməsi üçün istifadə edilməlidir. Vətəndaşlara bu hallarla qarşılaşdıqda və ya ümumiyyətlə qarşılaşmasa belə, yaxşı olar ki, edəcəyi bütün əməliyyatları rəsmi ödəniş sistemləri vasitəsilə həyata keçirsinlər. Digər tərəfdən, həmin icra ödənişi məhz borcludan icra sənədini könüllü icra üçün müəyyən olunmuş vaxtda, yəni 10 gün müddətində (əgər məhkəmə qərarında ayrı müddət göstərilməyibdə), üzrsüz səbəbdən icra etmədiyi hallarda alınması barədə qərar qəbul edilə bilər.

Ə.Əliyev xüsusi olaraq qeyd edir ki, icra məmuru icra sənədini aldığı andan etibarən 3 gün müddətində icraata başlamaq haqqında qərar qəbul etməli və könüllü icra müddəti barədə bildirişlə borcluya bir gün müddətində rəsmi şəkildə göndərməlidir: "Yəni bu zaman vətəndaşlar üçün həmin könüllü icra müddəti icraata başlamaq haqqında icra məmurunun qərarını aldığı andan hesablanır və bu müddət bitdikdən sonra üzrsüz səbədən dolayı olaraq icra edilməmişdirsə 7 fazilik icra ödənişi alınması barədə qərar qəbul edilə bilər. Digər hallarda icra ödənişinin alınması barədə qərar qəbul edilməsi tamamilə qanunsuzdur. Bu hallarda vətəndaşlar həmin qərardan müvafiq inzibati-iqtisadi məhkəməyə şikayət edə bilərlər. Eyni zamanda, vətəndaşlar əgər qanundan kənar hər hansı bir halla rastlaşarlarsa Ədliyyə Nazirliyinin İcra Baş İdarəsinə yazılı şikayət edə və ( və ya) 012 539 7675 qaynar xəttinə həmin icra məmuru barəsində məlumat verə bilərlər. Ədliyyə Nazirliyinin elektron portalında http://exidmet.justice.gov.az/WebForms/SEND_MAIL.aspx keçidindən istifadə etməklə şikayətləri elektron şəkildə də etmək mümkündür. Ədliyyə Nazirliyi bu müraciətlərə çox həssas yanaşır. Şəxsən öz təcrübəmdə bu və bu kimi hallarla bağlı Nazirliyin əməkdaşları tərəfindən edilən elektron müraciətdən sonra operativ tədbirlərin görüldüyünü müşahidə etmişəm.