Azərbaycan Milli Elmlər Akademiyası (AMEA) Rəyasət Heyətinin bu il mayın 24-də keçirlən iclasında keçmiş rabitə və yüksək texnologiyalar naziri Əli Abbasova yeni vəzifə verilməsi cəmiyyətdə birmənalı qarşılanmadı. Çünki o vaxtadək çoxları AMEA-nın müşaviri təyin olunan Ə.Abbasovun "MTN işi və "Rabitə işi kimi qalmaqallı hadisələrdən sonra bir daha dövlət qurumlarına yaxın buraxılmayacağı qənaətinə gəlmişdi.
Amma görünür belə deyilmiş...
Həmin təyinatdan sonra Əli Abbasovun AMEA-da müşavir kimi işə çıxması ətrafında söz-söhhbətlər səngimir. İddialara görə, guya, Ə.Abbasov hələ ki yeni vəzifəsini icra etmir.
Unikal.org xəbər verir ki, məsələ ilə bağlı Modern.az saytı AMEA ilə əlaqə saxlayıb. Akademiyadan saytımıza bildirilib ki, Əli Abbasov hazırda vəzifəsinin başındadır.
"Əli Abbasov artıq 2 aydan artıqdır ki, AMEA-nın müşaviri vəzifəsindədir. Hazırda da işinin başındadır. İşə gəlməməsi ilə bağlı yayılan xəbərlər doğru deyil.
Qeyd edək ki, Əli Abbasov 2004-2015-ci illərdə rabitə və yüksək texnologiyaları naziri vəzifəsində çalışıb. Prezidentin 12 noyabr 2015-ci il tarixli sərəncamı ilə tutduğu vəzifəsindən azad edilib. Əli Abbasov keçmiş Rabitə və Yüksək Texnologiyalar Nazirliyində üzə çıxan irimiqyaslı korrupsiya və mənimsəmə faktlarından sonra vəzifədən kənarlaşdırıldı.
Həmin korrupsiya işini araşdırıb yekunlaşdıran məhkəmə keçmiş Rabitə və Yüksək Texnologiyalar Nazirliyinin bir qrup vəzifəli şəxsi barəsində hökm çıxarıb.
