Ukraynanın tanınmış "Diplomat jurnalında Azərtac-ın Ukrayna, Belarus, Moldova üzrə xüsusi müxbiri Emil Hüseynlinin Azərbaycan Prezidenti İlham Əliyevin uğurlu xarici siyasətinə həsr olunan "İşıqlı gələcəyə aparan yol sərlövhəli məqaləsi dərc edilib.

Unikal.org xəbər verir ki, Ukrayna və ingilis dillərində dərc olunan məqalədə dövlətimizin başçısının Azərbaycanın milli maraqlarına xidmət edən xarici siyasəti barədə geniş məlumat verilib.

Müəllif məqaləsində yazıb ki, dünyada yaranan yeni münaqişə ocaqları, beynəlxalq qanunların təməl prinsiplərinin pozulması, ikili siyasət və digər bu kimi amillər hər bir dövlət başçısından daha praqmatik, uzaqgörən siyasət yürütməyi tələb edir:

"İlham Əliyevin rəhbərliyi ilə həyata keçirilən uğurlu xarici siyasət ölkəmizi beynəlxalq aləmdə söz sahibinə çevirib. Azərbaycan bütün ölkələrlə münasibəti mehriban qonşuluq və səmimi tərəfdaşlıq üzərində qurub, bu əməkdaşlığa daim sədaqətini nümayiş etdirir.

Məqalədə qeyd olunur ki, İ.Əliyevin rəhbər tutduğu ideya və prinsiplər yürüdülən xarici siyasətin xalqımızın milli maraqlarına uyğun olduğunu göstərir və bu siyasətin uğurunu şərtləndirir.