Yeni Zelandiyanın qədim yerli sakinləri olan maorilərin partiyası ölkənin adının rəsmi şəkildə dəyişdirilməsi bəyanatı ilə çıxış edib. 

Unikal.org "The Guardian"a istinadən xəbər verir ki, onlar vətənlərinə maori dilində "uzun ağ bulud ölkəsi" mənasını verən "Aotearoa" adının qaytarılması təklifini irəli sürüblər.
Maorilərin fikrincə, yalnız ölkəyə yox, həm də onun ərazisindəki digər toponimlərə də əvvəlki adlarını qaytarmaq lazımdır. Partiyada düşünürlər ki, hakimiyyət bununla ölkə sakinlərini birləşdirməyə müvəffəq olacaq:

"Ölkənin ilk və rəsmi dili olaraq maorini öz qanuni yerinə qaytarmağın vaxtı çoxdan çatıb. Biz polineziya ölkəsiyik, biz Aotearoayıq . Yeni Zelandiya isə holland toponimidir. Hətta hollandlar belə Hollandiya adını Niderlanda dəyişiblər"- deyə partiya liderləri vurğulayırlar.


Baş nazir xanım Kasinda Ardern ölkənin adının dəyişdirilməsi təkilfini hökumətin nəzərdən keçirmədiyini bildirsə də, getdikcə "Aotearoa" məfhumunun Yeni Zelandiya sözünün sinonimi kimi daha tez-tez işlədildiyini eşitdiyini və bunun müsbət bir hal olduğunu vurğulayıb.

Ağarza Elçinoğlu