Bu gün Azərbaycan Dillər Universitetinin və Bakı Slavyan Universitetinin Germanistika İnstitutlarının birgə təşkilatçılığı ilə Ümummilli lider Heydər Əliyevin anadan olmasının 99-cu ildönümünə həsr olunmuş “Germanistikanın yeni yolları. Avropa və Qafqaz arasında ədəbiyyat və mədəniyyət mübadiləsi” adlı beynəlxalq simpoziumun açılış mərasimi keçirilib. Əvvəlcə tədbir iştirakçıları Azərbaycan Dillər Universitetinin foyesində ulu öndər Heydər Əliyevin büstü önünə gül dəstələri düzüb, xatirəsini ehtiramla anıblar.
"Unikal" xəbər verir ki, simpoziumun konsepsiyasını qloballaşma prosesinin akademik elmə nüfuz etməsi, bilik və tədqiqat sahələri arasındakı sərhədlərin azalması kimi faktorlar, mədəni mübadilə proseslərini öyrənən yeni bir istiqamətin - mədəniyyət transferi sahəsinin yaranmasına gətirməsi təşkil edir.
Azərbaycan Dillər Universitetinin rektoru, akademik Kamal Abdulla simpoziumun əhəmiyyətindən danışıb, qloballaşma prosesinin akademik elmə nüfuz etməsi, bilik və tədqiqat sahələri arasındakı sərhədlərin azalması kimi faktorlar, mədəni mübadilə proseslərini öyrənən yeni bir istiqamətin - mədəniyyət transferi sahəsinin yaranması ilə bağlı fikirlərini bölüşüb:
“Bu gün bizim üçün çox gözəl bir gündür. Azərbaycanı və azərbaycanlıları sevənlər üçün bu günün xüsusi əhəmiyyəti var. Simpozium Ulu öndərimiz Heydər Əliyevin anadan olmasının 99-cu ildönümünə həsr olunub. Bu konfrans Avropa ilə Qafqaz arasında bir elmi körpü rolunu oynayır. Almaniyadan, Niderlanddan, Fransadan, Gürcüstandan və başqa ölkələrdən gələn həmkarlarımızı səmimi qəlbdən salamlayıram. Ümid edirəm bizim əməkdaşlığımız konfransdan sonra da davam edəcək. Həm Azərbaycan Dillər Universitetinin, həm də Bakı Slavyan Universitetinin auditoriyalarından konfransda iştirak edən dünyaca tanınmış alimlərin səsi ucalacaq. Konfransın təşkilində bizə yaxından kömək edən hər bir əməkdaşa təşəkkür edirəm”.
Nəsimi rayon İcra Hakimiyyətinin başçısı Asif Əsgərov konfranslar bağlı fikirlərini bölüşüb. Bildirilib ki, konfrans böyük əhəmiyyətə malikdir, müəllim və tələbələrin elmi biliklərinin inkişafı istiqamətində xüsusi rol oynayacaq. Qonaq beynəlxalq səviyyəli elmi tədbirin təşkilində dəstəyi və əməyi olanlara, təşkilat komitəsinin üzvlərinə, məruzəçilərə, məqalə və tezis müəlliflərinə təşəkkürünü bildirib.
Bakı Slavyan Universitetinin rektoru, siyasi elmlər üzrə fəlsəfə doktoru Anar Nağıyev simpozium iştirkaçılarına yeni elmi istiqamətlərin və elmi tədqiqatların önəmindən, gənc alimlərin bu simpoziumda iştirakının vacibliyindən söz açıb. Gələcək elmi əməkdaşlıq və müəllim-tələbə mübadiləsi yönündə görüləcək işlərin bu simpozium vasitəsilə ilkin başlanğıc olacağını qeyd edib. Konfransa həm yerli, həm də xarici ali təhsil və elm ictimaiyyəti tərəfindən böyük maraq göstərildiyini qeyd edən rektor Anar Nağıyev təşkilati işlərin yüksək səviyyədə aparıldığını söyləyib.
Bakı Beynəlxalq Multikulturalizm Mərkəzinin icraçı direktoru Rəvan Həsənov konfransın əhəmiyyətindən söz açıb. Vurğulanıb ki, konfransda dünyanın bir çox ölkəsindən olan alim və professorlar iştirak edir. Bu da konfransın işinə və önəminə xüsusi təsir etmiş olur. Elmi əməkdaşlığın qurulmasının vacibliyindən danışan Rəvan Həsənov gələcəkdə bu kimi konfransların davamlı olacağına inandığını söyləyib.
Simpoziumda Avstriyanın Azərbaycandakı səfiri Aleksandr Bayerl çıxış edərək qarşılıqlı əməkdaşlığın faydalarında söhbət açıb. Səfir universitet rəhbərliyini və kollektiv üzvlərini universitetdə beynəlxalq elmi konfransın keçirilməsi münasibətilə təbrik edib və tədbirin təşkilatçılarına təşəkkürünü bildirib.
Simpoziuma İtaliyadan iştirakçı kimi qoşulan Germanistika üzrə Beynəlxalq Assosiasiyasının prezidenti Laura Auteri yeni əməkdaşlıq əlaqələrinin gələcək inkişaf istiqamətlərinə toxunub. Qonaq elmi potensialın gücləndirilməsi məqsədilə həyata keçirilən birgə tədbirlərdən danışıb, konfrans çərçivəsində irəli sürüləcək və dayanıqlı inkişafa fayda qazandıracaq yeni fəaliyyət təşəbbüsləri üzrə universitetlər arasında hərtərəfli əməkdaşlığa hazır olduğunu diqqətə çatdırıb.
Almaniyanın Azərbaycandakı səfirinin müavini Hayko Şvars bildirib ki, tədbir yüksək səviyyədə təşkil olunub. Elmi tədqiqat üçün əlverişli imkanlar yaradılıb. Qeyd olunub ki, konfransın beynəlxalq tərədaşlıq çərçivəsində keçirilməsi yeni elmi biliklərin və təcrübələrin əldə olunmasına köməklik etmiş olacaq.
ADU-nun məzunu, Azərbaycanın Almaniyada sabiq səfiri olmuş Hüseynağa Sadıqov konfransın uğurla keçirildiyini və elmi əməkdaşlıq baxımından böyük əhəmiyyətə malik olmasını qeyd edib. Vurğulanıb ki, beynəlxalq münasibətlərin qurulmasında dillərin öyrənilməsi və elmi mübadilələrin aparılması vacib məsələlərdəndir.
Simpoziumda Almaniya, Avstriya, İtaliya, Türkiyə, Qazaxıstan, Gürcüstan və s. ölkələrin müxtəlif universitetlərindən olan alim və professorlar, gənc tədqiqatçılar və media nümayəndələri iştirak ediblər.
Simpozium çoxşaxəli elmi yaradıcılıq imkanlarının müəyyən olunmasında və istedadlı alimlərin yetişməsində xüsusi rol oynayır.
Bildirilib ki, nümayiş olunan filmlər və təqdim olunan kitablar simpoziumun proqramına rəngarənglik qatır.
Simpozium çərçivəsində iştirakçılar Şamaxıda səfərdə olacaq, mühazirə və seminarlarla çıxış edəcəklər. Qeyd etmək lazımdır ki, simpoziumda təqdim olunan mövzular öz aktuallığı ilə seçilir. Simpozium bölmə iclasları, kitab təqdimatları və mühazirələrlə davam edib.
