Avropa İttifaqına sədrlik edən Çexiya enerji bazarlarında artımın həllini müzakirə etmək üçün enerji nazirlərinin növbədənkənar iclasını çağırıb.

"Unikal" xəbər verir ki, Çexiyanın sənaye və ticarət naziri Yozef Sikela sentyabrın 9-da Brüsseldə fövqəladə iclasın keçiriləcəyini və iclasda enerji böhranı ilə mübarizə üçün konkret tədbirlərin müzakirə olunacağını açıqlayıb.

Sikela bildirib ki, Çexiya hakimiyyət orqanları elektrik enerjisi istehsalı üçün istifadə olunan təbii qazın qiymətlərinə yuxarı həddi təklif ediblər:

"Enerji bazarı fəaliyyətini dayandırıb və bunu düzəltmək lazımdır".

Çexiyanın Baş naziri Petr Fiala, Avropa Komissiyasının sədri Ursula Von Der Leyen ilə insanlara və müəssisələrə digər üzv dövlətlər tərəfindən dəstəklənə biləcək yüksək enerji xərclərinin öhdəsindən gəlməyə kömək etməyin mümkün yolları barədə danışdığını söyləyib.

Fiala bazar ertəsi Praqada Almaniya kansleri Olaf Scholz ilə də görüşərək enerji böhranının həlli üçün ümumavropa yanaşmalarını müzakirə edəcək.