Akademik İsa Həbibbəyli AMEA-nın prezidenti seçilib.
"Unikal" xəbər verir ki, bu barədə məsələyə Akademiyanın ümumi yığıncağında baxılıb. AMEA-nın prezidentliyinə akademik İsa Həbibbəylinin namizədliyi təsdiqlənib.
Namizədlik təsdiqləndikdən sonra alimlərin çıxışı başlayıb.
Çıxışlardan sonra yeni prezidentin seçilməsi üçün gizli səsvermə olub.
Səsvermənin nəticəsi olaraq İsa Həbibbəyli akademiyanın yeni prezidenti seçilib.
***
Bu gün Azərbaycan Milli Elmlər Akademiyasının Ümumi yığıncağı keçirilib.
"Unikal" xəbər verir ki, AMEA-nın prezidentliyinə akademik İsa Həbibbəylinin namizədliyi təsdiqlənib, daha sonra qurumun prezidentinin seçilməsi üçün səsvermə başlayıb.
Namizədlər arasında İsa Həbibbəyli tək olub. Hazırda səsvermə davam edir.
*** 12:07
"Unikal" xəbər verir ki, tədbirdə müzakirəyə çıxarılan ilk məsələ Azərbaycan Milli Elmlər Akademiyasının yeni Nizamnamə layihəsinin təsdiq edilməsi haqqında olub.
Məsələ ilə bağlı çıxış edən AMEA-nın prezidenti v.i.e., akademik Arif Həşimov bildirib ki, Azərbaycan Respublikasının Prezidenti cənab İlham Əliyev “Azərbaycan Respublikasında elm və təhsil sahəsində idarəetmənin təkmilləşdirilməsi ilə bağlı bəzi tədbirlər haqqında” 28 iyul 2022-ci il tarixli Fərman imzalayıb. Fərmanda elm və təhsilin qarşılıqlı əlaqəsinin möhkəmləndirilməsi və bu sahələrdə idarəetmənin təkmilləşdirilməsi məqsədilə mühüm struktur dəyişiklikləri yer alıb.
Akademikin sözlərinə görə, elm və təhsil sahəsində əsaslı struktur dəyişikliyi ilə əlaqədar olaraq, Fərmanın 8-ci bəndində Azərbaycan Milli Elmlər Akademiyasına Akademiyanın Ümumi yığıncaqda qəbul edilmiş yeni Nizamnamənin üç ay müdddətində Azərbaycan Respublikasının Prezidentinə təqdim edilməsi tapşırılıb. Bundan irəli gələrək, Fərmanın 8-ci bəndinin icrasının təmin edilməsi məqsədilə AMEA-nın yeni Nizamnamə layihəsi hazırlanaraq AMEA-nın Ümumi yığıncağına təqdim edilib.
Sonra AMEA-nın vitse-prezidenti, Akademiyanın Nizamnamə Komissiyasının sədri, akademik İsa Həbibbəyli çıxış edərək AMEA-nın yeni Nizamnamə layihəsini təqdim edib. Bildirib ki, yeni Nizamnamə Akademiyanın işinin və elmi fəaliyyətin yenidən təşkili ilə əlaqədar məsələləri, elmi-təşkilati proseslərin tənzimlənməsi mexanizmlərini əks etdirir. Akademikin sözlərinə görə, 14 maddədən və 228 bənddən ibarət olan yeni Nizamnamə layihəsində Akademiyanın strukturu, vəzifələri və hüquqları, Akademiyanın Ümumi yığıncağının, Rəyasət Heyətinin, elmi bölmələrin, regional elmi mərkəzlərin, elmi müəssisələrin, elmi-xidmət müəssisələrinin fəaliyyət istiqamətləri müəyyən olunub, Akademiyaya seçkilərlə əlaqədar məsələlərə dair prosedurlar əhatə edilib.
Daha sonra açıq səsvermənin nəticələrinə əsasən, AMEA-nın yeni Nizamnamə layihəsi təsdiq edilib. AMEA-nın Rəyasət Heyətinə Ümumi yığıncaqda qəbul edilmiş yeni Nizamnamə layihəsinin Azərbaycan Respublikasının Prezidentinə təqdim edilməsinin təmin edilməsi tapşırılıb.
*** 11:29
Bu gün AMEA-da prezident seçkiləri keçiriləcək.
"Unikal" xəbər verir ki, seçkidə AMEA-nın vitse-prezidenti, akademik İsa Həbibbəylinin əsas namizəd olacağı və preident seçiləcəyi gözlənilir.
Qeyd edək ki, İ.Həbibbəylinin sədr olacağını "qafqazinfo" saytı yayıb.
***
Azərbaycan Milli Elmlər Akademiyasının yeni Nizamnaməsi təsdiqlənib.
"Unikal" xəbər verir ki, Nizamnamə bu gün keçirilən AMEA-nın Ümumi yığıncağında təsdiq edilib.
Qeyd edək ki, Azərbaycan Respublikası Prezidentinin Administrasiyasının Humanitar siyasət, diaspora, multikulturalizm və dini məsələlər şöbəsinin müdiri Fərəh Əliyava da toplantıda iştirak edir.
*** 11:04
Azərbaycan Milli Elmlər Akademiyasının Ümumi yığıncağı keçirilir.
"Unikal" xəbər verir ki, AMEA Rəyasət Heyətinin 21 oktyabr 2022-ci il tarixdə keçirilmiş iclasında Ümumi yığıncağın gündəliyinə AMEA-nın yeni Nizamnaməsinin müzakirəsi və təşkilati məsələlər təsdiq edilib.
