Bakıda Yol Patrul Xidməti (YPX) əməkdaşları tərəfindən saxlanılan sərxoş sürücü polisləri təhqir edib. 

"Unikal"ın əldə etdiyi məlumata görə, hadisə fevral ayının 4-də baş verib. Belə ki, paytaxtın Binəqədi rayonu ərazisində YPX əməkdaşları tərəfindən saxlanılan sürücü Rasim Namazov (ad və soyad şərtidir) polis əməkdaşlarını təhqir edib.

YPX əməkdaşları Post Patrul Xidmətinə (PPX) məlumat veriblər. Hadisə yerinə 4-cü polis şöbəsinin əməkdaşları gedib. YPX və PPX əməkdaşlarını təhqir etməyə davam edən Rasim saxlanılaraq polis şöbəsinə aparılıb.

Saxlanılan şəxs İkinci Qarabağ müharibəsinin iştirakçısı olduğunu və polis əməkdaşlarının bunu nəzərə almadıqlarını bildirib. 

R.Namazovla bağlı İnzibati Xətalar Məcəlləsinin 510-cu (Xırda xuliqanlıq) və 535.1-ci (Polis işçisinin və ya hərbi qulluqçunun qanuni tələbinə qəsdən tabe olmama) maddələri ilə protokol tərtib olunub, baxılması üçün məhkəməyə göndərilib. Binəqədi Rayon Məhkəməsinin qərarı ilə Rasim 1 ay müddətinə inzibati qaydada həbs olunub.

Murad İbrahimli