Xəbər verdiyimiz kimi, dünən Ankarada Qara Dəniz İqtisadi Əməkdaşlıq Təşkilatı Parlament Assambleyasının sammiti çərçivəsində insident qeydə alınıb.

"Unikal" xəbər verir ki, Rusiya və Ukrayna təmsilçiləri arasında olan davadan sonra rusiyalı nümayəndə xəstəxanaya yerləşdirilib. 

Bu barədə Rusiyanın Ankaradakı səfirliyinin mətbuat xidməti "Telegram" kanalında məlumat yayıb.

Səfirlik qeyd edib ki, Ukrayna nümayəndələri iki dəfə Rusiya nümayəndə heyətinin çıxışını pozmağa cəhd ediblər. 

Bu, ölkə parlamentlərinin spikerlərinin görüşü zamanı Rusiya nümayəndə heyətinin rəhbəri, Dövlət Dumasının deputatı Olqa Timofeyevanın çıxışı zamanı baş verib.

Türkiyə parlamentinin sədri Mustafa Şentop Timofeyevanın çıxışına mane olmamağa çalışaraq, Rusiya əleyhinə şüarlar səsləndirən, Ukrayna bayrağını dalğalandıran etirazçıları iclas zalından çıxarmaq istəyib. Bundan sonra Rusiya Dövlət Dumasının deputatı çıxışına davam edib, lakin mübahisə zaldan kənarda davam edib və orada Rusiya nümayəndə heyətinin üzvlərindən birinin Ukrayna bayrağını ərazidən çıxarmağa cəhd etməsindən sonra dava düşüb.

Gülayə Mecid