Avropa İttifaqının (Aİ) Xarici Əlaqələr üzrə Ali Nümayəndəsi və Komissiyanın vitse-prezidenti Cozep Borrellə göndərilən birgə məktubda Britaniya, Fransa və Almaniya İrana qarşı oktyabrın 18-də sona çatması gözlənilən ballistik raket sanksiyalarını davam etdirəcəklərini bildiriblər.
"Unikal" xəbər verir ki, Borrell verdiyi yazılı açıqlamada sözügedən ölkələrdən İranın nüvə razılaşması ilə bağlı narahatlıqlarını qeyd edən məktub aldığını bildirib:
“Bu gün Fransa, Almaniya və İngiltərə xarici işlər nazirlərindən Birgə Hərtərəfli Fəaliyyət Planının (JCPOA) həyata keçirilməsi ilə bağlı məktub aldım. Onlar İranın saziş üzrə öhdəliklərini yerinə yetirməməsi ilə bağlı narahatlıqlarını qeyd etdiklərini və 14 yanvar 2020-ci il tarixli bəyanatımda qeyd edildiyi kimi, bu məsələni JCPOA Mübahisələrin Həlli Mexanizmi çərçivəsində Birgə Komissiyaya təqdim etdiklərini xatırladırlar. Xarici işlər nazirləri İranın 2019-cu ildən bəri razılaşmanın şərtlərinə əməl etmədiyini bildirir və bu vəziyyətin nüvə razılaşmasının Mübahisələrin Həlli Mexanizmi ilə həll olunmadığını düşünürlər".
Borrell məktubu İran Nüvə razılaşmasında koordinator rolunu oynayan AB adından digər tərəflərə çatdırdığını deyərək, razılaşmaya qayıtmaq üçün sıx səylərini davam etdirəcəyini vurğulayıb.
"Tələb edildiyi kimi, mən məktubu JCPOA-nın digər iştirakçılarına, yəni Çin, İran və Rusiyaya göndərdim", - deyə o bildirib.
"Koordinator kimi mən irəliyə doğru hərəkət edən bütün JCPOA iştirakçıları ilə məsləhətləşəcəyəm. Tam öhdəliyimə sadiq qalıram və JCPOA-nın və sazişin tam icrasının bərpası üçün çalışaraq səyimi əsirgəməyəcəyəm".
Qeyd edək ki, BMT-nin sanksiyaları başa çatarsa, İranın nüvə silahı daşıya bilən ballistik raketlərin tədqiqi, inkişafı və istehsalına, İranın 300 kilometr və ya daha çox mənzilli raketlər və pilotsuz uçuş aparatları da daxil olmaqla, raketlə əlaqəli texnologiyaların idxalına və embarqoya qoyulan məhdudiyyətlər sona çatacaq.
