Rusiya Federasiyası Mərkəzi Seçki Komissiyası sentyabrda keçirilməli olan Kursk vilayətinin yeddi bələdiyyəsində yerli özünüidarəetmə orqanlarının deputatlarının seçkilərində səsvermənin təxirə salınması barədə qərar qəbul edib.

"Unikal" xəbər verir ki, bu barədə qərar Mərkəzi Seçki Komissiyasının iclasında regional seçki komissiyasının müvafiq bəyanatı ilə bağlı qəbul edilib.

Belovski, Bolşesoldatski, Qluşkovski, Korenevski, Sudjanski, Xomutovski rayonlarında və Lqov şəhərində səsvermə təxirə salınıb. 

Qanuna görə, Rusiya Federasiyasının Mərkəzi Seçki Komissiyası federal və regional səviyyədə seçkiləri, habelə Rusiya Federasiyasının təsis qurumunun iki və ya daha çox bələdiyyəsinin ərazisində yerli seçki komissiyasının müvafiq müraciəti əsasında seçkiləri daha gec tarixə təxirə salmaq hüququna malikdir. 

Rusiya Federasiyası Mərkəzi Seçki Komissiyasının üzvü Nikolay Leviçevin sözlərinə görə, Kursk vilayətinin seçki komissiyası avqustun 15-də müvafiq sorğu təqdim edib.

Sentyabrda həmçinin Kursk vilayətində vilayət başçısına seçkilərin keçirilməsi planlaşdırılır. 

Ağarza Elçinoğlu