Əfsanəvi KVN proqramının rejissoru Svetlana Maslyakova 78 yaşında vəfat edib.

"Unikal" xəbər verir ki, bu barədə Beynəlxalq KVN Birliyinin mətbuat xidməti məlumat yayıb.

Svetlana Maslyakova peşəkar həyatının böyük bir hissəsini KVN-ə həsr edib. O, klubun müasir tarixinin qurucularından biri olub, uzun illər televiziya oyun direktoru kimi çalışıb və həyat yoldaşı, uzun müddət KVN aparıcısı olan Aleksandr Maslyakovla birlikdə proqramların hazırlanmasında iştirak edib.

1966-cı ildə orta məktəbi bitirdikdən sonra Svetlana Maslyakova Mərkəzi Televiziyada köməkçi rejissor kimi işləməyə başlayıb. 1971-ci ildə Aleksandr Maslyakovla evlənib və daha sonra KVN direktoru olub, layihənin inkişafına mühüm töhfə verib.

Svetlana Maslyakova təkcə televiziya layihəsinin inkişafına böyük töhfə verməklə yanaşı, həm də klub üzvlərinin bir çox nəsilləri üçün mentor olub və gənc KVN oyunçularını daim dəstəkləyib.

Uzun müddət KVN aparıcısı və Rusiyanın əməkdar artisti olan Aleksandr Maslyakov 2024-cü ildə 82 yaşında vəfat edib. Bir müddət əvvəl KVN oyunlarının rəsmi prodüseri olan AMiK televiziya şirkətinin hüquqları oğulları Aleksandra keçib.