Firudin Sinirlioğlu: "Türkiyə Qarabağın həllində Azərbaycanı dəstəkləyir"
Türkiyənin xarici işlər naziri Firudin Sinirlioğlu Azərbaycanda səfərdədir. Nazir Fəxri Xiyabanı, Şəhidlər Xiyabanını və oradakı Türk Şəhidliyini ziyarət edib. Sonra o, Azərbaycan prezidenti İlham Əliyevin qəbulunda olub.
Daha sonra F.Sinirlioğlu ilə Azərbaycanın xarici işlər naziri Elmar Məmmədyarov arasında əvvəlcə təkbətək, daha sonra geniş formatda görüş keçirilib. Nazirlərin birgə mətbuat konfransı keçirilib.
Elmar Məmmədyarov Bakıda Türkiyənin müvəqqəti seçki hökumətinin xarici işlər naziri Firudin Sinirlioğlu ilə birlikdə keçirdiyi mətbuat konfransında deyib ki, Azərbaycanla Türkiyə böyük layihələr həyata keçirir. Nazir bildirib ki, görüşdə Bakı-Tbilisi-Qars dəmir yolu layihəsinin tamamlanması məsələsi müzakirə edilib: "Azərbaycan və Gürcüstan tərəfində bütün işlər görülüb. Əminik ki, bu ilin sonu, gələn ilin əvvəlinə kimi Türkiyə tərəfi də işləri bitirəcək. Bu, strateji layihədir və təkcə Cənubi Qafqaz üçün deyil, orta Asiya üçün də önəmlidir. Qazaxıstanla da bu məsələləri müzakirə etmişik. Türkmənistan və Çin də bu işdə çox maraqlıdır. Dəmir yolu millətləri bir-birinə sıx bağlayır".
E. Məmmədyarov regional məsələləri də müzakirə etdiklərini söyləyib: "Suriya miqrantları məsələsinə də toxunduq. Bizim üçün vacib məsələdir. Azərbaycan da öz yaxın tarixində belə vəziyyətlə üzləşib. Türkiyədə 2 milyona yaxın qaçqın məskunlaşıb. Bu problem tez bir zamanda aradan qaldırılmalı və həmin insanlar öz torpaqlarına qayıtmalıdır. Türkiyə Dağlıq Qarabağ münaqişəsinin həllində Azərbaycanı dəstəkləyir. Firudin bəy o zaman BMT Təhlükəsizlik Şurasının qətnamələri üzərində çalışmış diplomatlardan biridir".
"Azərbaycanda olmaqdan qürur duyuram. Dost və qardaş Azərbaycanla münasibətlərimiz müstəsna dəyərə malikdir". Bu sözləri Azərbaycanda səfərdə olan Türkiyənin xarici işlər naziri Firudin Sinirlioğlu həmkarı Elmar Məmmədyarovla keçirdiyi birgə mətbuat konfransında deyib. O bildirib ki, Azərbaycan sürətli addımlarla irəliləyir: "Bu, Azərbaycan üçün olduğu kimi, Türkiyəyə üçün də sevinc və qürur mənbəyidir. Hər dəfə gördüyüm inkişafdan qürur duyuram. Türkiyə və Azərbaycan gücünü ortaq tarixi bağlardan alır. Bu iki ölkə təkcə qardaş deyil, həm də strateji ortaqdır. Tez-tez yüksək səviyyəli beynəlxalq tədbirlər çərçivəsində də görüşürük. Azərbaycan bu bölgənin sabit, güclü və hər sahədə inkişaf edən ölkəsidir. Ölkə qlobal səviyyədə əhəmiyyətini artırır. Azərbaycanın bir sabitlik mənbəyi olaraq oynadığı rola önəm veririk. Enerji və nəql sahələrində birgə layihələrimiz var. Terrorizmlə bağlı təhdidlərə qarşı da birgə mübarizə aparırıq. Əfqanıstan məsələsində olduğu kimi, beynəlxalq sülh və təhlükəsizliyə töhfə veririk".
F. Sinirlioğlu əsas müzakirə mövzusunun Dağlıq Qarabağ münaqişəsi və Azərbaycan torpaqlarının işğalının davam etməsi olduğunu söyləyib: "Regional təhlükəsizlik və inkişafın qarşısında duran ən böyük problem kimi gördüyüm bu məsələ Azərbaycanın ərazi bütövlüyü çərçivəsində həll olunmalıdır. Türkiyə olaraq bu sahədə səylərimizi artırmaq əzmindəyik. Problemin bu şəkildə həllinin bölgədə normallaşmanın yolunu aça biləcəyi və bütün ölkələrin yararına olacağı məlumdur. Gözləntilərimiz bunun başqa ölkələr və beynəlxalq toplum tərəfindən dərk edilməsi və vaxt itirilmədən səylərin artırılmasıdır. Minsk Qrupunun səylərini izləyir və lazım olduqda onları tənqid edərək təşviq etməyə çalışırıq. Problemin dərinləşməsinə yol aça biləcək addımlardan çəkinmək lazımdır. Dağlıq Qarabağda bu yaxınlarda keçirilən qondarma "seçki" yanlış və təxribat xarakterli addımdır və bunu qınayırıq. Bu addımın nəticə verməyəcəyi aşkardır".
F. Sinirlioğlu bəyan edib ki, Türkiyə və Azərbaycan regionda mövcud olan üçtərəfli əməkdaşlıq formatlarını davam etdirməyə sadiqdir: "Enerji və daşınma layihələrinin bölgənin inkişafı naminə davam etdirilməsində qərarlıyıq. TANAP və BTC layihələrini bu çərçivədə görürük. Noyabr ayında G20 sammiti çərçivəsində Azərbaycan prezidenti İlham Əliyevi Antalyada görməkdən qürur duyacağıq. Ölkəmizin xüsusi dəvətlisi olan Azərbaycanın hər sahədə töhfələri önəmlidir. Birinci Avropa Oyunlarında uğurları münasibətilə Azərbaycanı bir daha təbrik edirəm. Noyabrın 1-də hər iki ölkədə keçiriləcək seçkilərin ölkələrimiz üçün yaxşı nəticələri olacağına əminəm".
E.Rüstəmov
