"Azərbaycanda "Aİ-98 super markalı benzinin bahalaşması heç bir sahəyə təsir etməyəcək. 

Unikal.org xəbər verir ki, bu barədə "APA-Economicsə açıqlamasında İqtisadiyyat Nazirliyinin İctimaiyyətlə əlaqələr şöbəsinin müdiri Abbas Əliyev bildirib.

"Sözügedən markalı benzin Azərbaycanda istehsal olunmur və idxala bağlıdır, bu səbəbdən onun qiyməti dövlət tərəfindən tənzimlənmir. Beləliklə, qiymət dəyişikliyinin hər hansı sahəyə təsirindən danışmaq yersizdir. Bəzi xəbər saytlarının bu mövzuda ajiotaj yaratması yolverilməzdir, - deyə A. Əliyev qeyd edib.
Qurum rəsmisi bildirib ki, "Super markalı benzindən çox az sayda lüks avtomobillərdə istifadə olunur.
Xatırladaq ki, bu gündən etibarən Azərbaycanda "Aİ-98 super" markalı 1,20 manatdan 1,30 manatadək bahalaşıb.

"Super" markalı benzin yalnız "SOCAR Petroleum" QSC-nin yanacaqdoldurma məntəqələrində satılır.

Adıçəkilən şirkətin mətbuat xidmətindən "APA-Economics"ə bildirilib ki, qiymət artımı bu gün səhər 08:00-dan etibarən baş verib. "Bilirsiniz ki, "Super" markalı benzin Azərbaycana idxal olunur və yalnız SOCAR brendi altında fəaliyyət göstərən yanacaqdoldurma məntəqələrində satılır. Qiymət artımına səbəb mənbədə, yəni Rumıniyada bu markadan olan benzinin bahalaşmasıdır", - deyə şirkət rəsmisi bildirib.