Azərbaycan Karate Federasiyası növbəti dəfə maaş problemi ilə üz-üzə qalıb.
Unikal.org-un əldə etdiyi məlumata görə, sponsorsuz qaldığı üçün yanvar ayından Azərbaycan Gənclər və İdman Nazirliyi tərəfindən maliyyələşən qurum uzun müddətdir ki, maaş üzünə həsrətdir. Hazırda federasiya pulsuzluq üzündən yarışlardan da kənar qalıb.
İdmançılar yarışlara öz ciblərindən pul xərcləyərək gedirlər. Yəni, özünün başqa yerdən gəliri, imkanı olan karateçilər yarışlarda iştirak edə bilirlər.
Məlumatda o da bildirilir ki, AMKF nazirliyin ayırdığı pulla iyulda keçirilən yarışa tamheyətlə gedə bilməmişdir. Millinin sadəcə yarısı həmin yarışa qatıla bilmişdi. Pulsuzluq o həddə çatıb ki, federasiyanın həm icarə haqqı, həm də vergi borcu yaranıb.
Bildirilir ki, idmançılar yay aylarında İran, Türkiyə və İsveçrədəki beynəlxalq yarışlara federasiya prezidenti Yaşar Bəşirovun şəxsi münasibətləri hesabına ödənişsiz gediblər. Yəni, o təşkilatçılardan xahiş edib. Bəzi yarışlar idmançılara pulsuz başa gəlib.
Məsələ ilə bağlı AMKF-nin mətbuat katibi Sənan Məhərrəmov Unikal.org-a açıqlamasında maaşların gecikdiyini təsdiqləyib: "Düzdür, maaşlarda 6 aya yaxındır ki, gecikmə var. Biz mayda aprelin maaşını almışıq. Həmin gündən sonra maaş almamışıq. Federasiyanın prezidentindən, idmançısından tutumuş digər işçilərinə qədər heç kimə maaş verilməyib. Oktyabrın sonlarında İspaniyada Gənclər üzrə Dünya çempionatı keçiriləcək. Maliyyə olmadığı üçün yarışa idmançı göndərə bilmirik. İslamiadaya qədər problemsiz şəkildə federasiyaya pul ödənilirdi.
Aygün İlqarqızı
