"Rabitə işi"ndə təqsirləndirilən "Bakı Telefon Rabitəsi" İstehsalat Birliyinin sabiq rəhbəri Beytulla Hüseynov saxlanıldığı Bakı İstintaq Təcridxanasından cəzaçəkmə müəssisəsinə köçürülüb.

Unikal.org report-a istinadən xəbər verir ki, sabiq rəis Penitensiar Xidmətinin 10 saylı cəzaçəkmə müəssisəsinə etap olunub.

O, bundan sonra cəzasını həmin cəzaçəkmə müəssisəsində çəkəcək.

Qeyd edək ki, Rabitə və Yüksək Texnologiyalar Nazirliyi (RYTN) Aparatının sabiq rəhbəri Vidadi Zeynalov, "Bakı Telefon Rabitəsi" İstehsalat Birliyinin sabiq rəhbəri Beytulla Hüseynov və digərləri 2015-ci ilin noyabr ayında həbs edilib. Həmin şəxslərin əmlaklarının üzərinə həbs qoyulub.

Bakı Ağır Cinayətlər Məhkəməsinin hökmü ilə V.Zeynalovla B.Hüseynovun hər biri 13 il müddətinə azadlıqdan məhrum edilib. Bakı Apellyasiya Məhkəməsinin qərarı ilə V.Zeynalovun cəzası 4 ilə və B.Hüseynovun cəzası isə 7 il 6 aya endirilib.

Həmçinin qərara əsasən, V.Zeynalov və digər təqsirləndirilən şəxslərin bəzi əmlaklarının üzərinə qoyulmuş həbs götürülüb. Belə ki, təqsirləndirilən şəxslərin 2009-cu ilə qədər əldə olunan əmlaklarının üzərindən həbs götürülüb və müsadirə dayandırılıb.

Daha sonra V.Zeynalovun ailə üzvləri və B.Hüseynov kassasiya şikayəti ilə Ali Məhkəməyə müraciət edib. Məhkəmə iclasının vaxtı yaxın günlərdə bəlli olacaq.