"Yaxın 3-6 ay ərzində 700-dən çox nəqliyyat vasitəsi BNA-nın köməkliyi ilə nağdsız ödəniş sisteminə keçəcək.

Unikal.org xəbər verir ki, bunu Bakı Nəqliyyat Agentliyinin (BNA) baş direktorunun müşaviri Mübariz Abbasov marşrut daşıyıcıları ilə görüş zamanı bildirib.

M.Abbasovun sözlərinə görə, 2018-ci ilin 6 ayı ərzində ictimai nəqliyyatda nağdsız ödəniş sisteminə keçilməlidir.

"Bilirik ki, bəzi daşıyıcıların maddi problemləri var. Nağdsız ödəniş sisteminə keçilməsi üçün BNA bu daşıyıcılara da köməklik edəcək. Bundan başqa, bəzi daşıyıcılar sürücü çatışmazlığını da bəhanə edirlər. BNA bununla bağlı da həmin daşıyıcılara köməklik edəcək. Bildiyiniz kimi, BNA "D" kateqoriyalı sürücülük vəsiqəsi olan şəxslər üçün sürücü elanı verib. Bir çox insanlar var ki, "D" kateqoriyalı sürücülük vəsiqəsi olduğu halda işsizdir. Biz onları da sürücü-təlim bazasına cəlb edəcəyik. Daşıyıcılar sürücülərin iş saatı ilə bağlı işlərə də mütləq baxmalıdır", - deyə M.Abbasov vurğulayıb.


Qurum rəsmisi BNA-nın tələblərinə cavab verməyən daşıyıcı ilə bağlı tədbir görüləcəyini bildirib: "Dəfələrlə demişik ki, sürücülər işə götürülərkən tibbi arayış olmalıdır, ASAN xidmətdən məhkumluğunun olub-olmaması haqqında arayışı gətirməlidir, nəqliyyat vasitələri əsaslı təmir olunmalıdır, sürücülər işə götürülərkən sürücü təlim mərkəzindən təlimdən keçməlidir. Artıq son günlər baş verən yol qəzaları bizi məcbur edir ki, müəyyən tədbirlər həyata keçirək. Hansı daşıyıcı BNA-nın tələblərinə cavab verməsə, həmin daşıyıcı ilə BNA arasında bağlanmış müqaviləyə xitam veriləcək".

M.Abbasovun onu da vurğulayıb ki, Bakıda texniki baxımdan istismara yararlı avtobusların sayı azdır və ehtiyat avtobusların da olmaması əsas problemlərdən biridir. 


"Keçən ildən sürücü bazası yaradılıb və orada adı olan 3000-dən çox sürücü ilə bağlı Daxili İşlər Nazirliyi və digər aidiyyəti orqanlara müraciət olunub".

Onun sözlərinə görə, Daxili İşlər Nazirliyindən BNA-ya cavab gəlib: "Agentliyə daxil olan məlumatda 3008 sürücünün 461-nin məhkumluq həyatı yaşadığı qeyd olunub. Bu məsələ əlaqədar daşıyıcılar BNA ilə birgə araşdırma aparacaq. Məhkumluğun növünə görə yekun qərar qəbul olunacaq".

M.Abbasov əlavə edib ki, bu ilin 3-6 ayı ərzində 700 nəqliyyat vasitəsi nağdsız ödəniş sistemi keçiriləcək.