"Azərsu" ASC-də 5 iyun – Su Təsərrüfatı və Meliorasiya İşçiləri Günü qeyd edilib.

Bu barədə Unikal.org-a qurumdan bildirilib. 

Məlumata görə, “Azərsu”yun, eləcə də "Azərbaycan Meliorasiya və Su Təsərrüfatı" ASC-nin kollektivləri Fəxri xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini yad edib, məzarı önünə əklil qoyub.

Görkəmli oftalmoloq-alim, akademik Zərifə xanım Əliyevanın da xatirəsi anılıb. Sonra Şəhidlər xiyabanında Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman vətən övladlarının xatirəsi yad edilib. Bakı Biznes Mərkəzində təşkil olunmuş sərgiyə baxış keçirilib, peşə bayramı günü ilə əlaqədar Azərbaycan Respublikası Prezidentinin aqrar siyasət məsələləri üzrə köməkçisi-şöbə müdiri Azər Əmiraslanov, Milli Məclisin aqrar siyasət komitəsinin sədri Eldar İbrahimov meliorasiya və su təsərrüfatı sahəsində görülən işlərdən danışaraq bu sahədə çalışanları təbrik edib.

“Azərsu”da keçirilən tədbirdə Cəmiyyətin sədri Qorxmaz Hüseynov əhalinin sosial vəziyyətinin yaxşılaşdırılmasına hesablanmış su təchizatı layihələrinin icrasında su təsərrüfatı işçilərinin böyük xidmətlərinin olduğunu qeyd edib. Su təsərrüfatı və meliorasiya sahəsi işçilərinin əməyini yüksək qiymətləndirən Prezident İlham Əliyevin 14 may 2014-cü il tarixdə imzaladığı sərəncamla iyun ayının 5-i Su Təsərrüfatı və Meliorasiya İşçiləri Günü peşə bayramı təsis edilib.

Q.Hüseynov su təsərrüfatı sektorunun böyük və şərəfli tarixi olduğunu diqqətə çatdırıb. Bildirib ki, ölkəmizdə su təchizatı və kanalizasiya layihələrinin böyük bir hissəsi Azərbaycan xalqının böyük oğlu, görkəmli dövlət xadimi Heydər Əliyevin adı ilə bağlıdır. Ulu öndərin rəhbərliyi ilə ötən əsrin 70-80-ci illərində və müstəqilliyin ilk illərində yeni su mənbələri yaradılıb, sugötürücü və sutəmizləyici qurğular, su anbarları, nasos stansiyaları, magistral kəmərlər və paylayıcı şəbəkələr tikilib. Bu sahədə başlanılan işləri uğurla davam etdirən Prezident İlham Əliyevin tapşırıqlarına uyğun olaraq, istehlakçıların içməli su təchizatının və kanalizasiya xidmətlərindən istifadəsinin yaxşılaşdırılması məqsədi ilə ölkə miqyasında genişmiqyaslı işlər görülüb, mühüm layihələr həyata keçirilib.

Ulu öndər Heydər Əliyevin təşəbbüskarı olduğu və Prezident İlham Əliyevin iştirakı ilə istismara verilən Oğuz-Qəbələ-Bakı su kəməri Azərbaycanın müstəqillik illərinin ən böyük infrastruktur layihəsi kimi tarixə düşüb. Ceyranbatan Ultrasüzgəcli Sutəmizləyici Qurğular Kompleksinin, Küllülü su mənbəyinin, Şirvan-Muğan, Sabirabad-Saatlı qrup su kəmərlərinin, həmçinin Xanbulançay, Mingəçevir, Şəmkirçay və Quba sutəmizləyici qurğuları, ümumilikdə, 39 yeni su mənbəyinin istismara verilməsi regionlarda əhalinin keyfiyyətli içməli su ilə təminatına mühüm töhfələr verib. Su və kanalizasiya layihələrinin icrasına başlanılan 50 şəhər və rayon mərkəzinin 38-də su şəbəkələrinin tikintisi yekunlaşıb. Şəhər və rayon mərkəzləri ilə yanaşı, əhalisinin sayı 1 milyon 400 min nəfər olan 1050 kənddə içməli su təchizatının yaxşılaşdırılması ilə bağlı işlər görülüb.

Ötən müddətdə “Azərsu”da institusional islahatlar aparılıb, müştəri xidmətləri, kadr hazırlığı, informasiya-kommunikasiya texnologiyalarından istifadə, suyun keyfiyyətinin yüksəldilməsi və əməyin təhlükəsizliyi sahəsində nailiyyətlər əldə olunub. Yeni regional idarələrin yaradılması, regional laboratoriyaların fəaliyyətə başlaması əhaliyə göstərilən xidmətlərin keyfiyyətinin yüksəldilməsinə xidmət edib.

Tədbirin sonunda əmək fəaliyyətində fərqlənən əməkdaşlar təltif olunub. “Azərsu” sədrinin əmri ilə 119 əməkdaş Fəxri fərmana, 100 əməkdaş isə “Təşəkkürnamə”yə layiq görülüb.