Qazaxıstanın Almatı şəhərində Azərbaycan vətəndaşı, 3 uşaq anası Bəturə Məmmədova soyğunçuluq məqsədi ilə qaçırılıb və qətlə yetirilib.

Unikal.org Virtualaz.org-a istinadən xəbər verir ki, bu barədə Qazaxıstan KİV-lərinin reportajında bildirilir.

Gözəllik salonunda kosmetoloq işləyən 40 yaşlı Bəturənin yoxa çıxması haqda xəbər saytlarda bu ilin may ayının sonlarında çıxıb. Xəbərdə deyilirdi ki, qadın mayın 27-də axşam saat 8 radələrində işdən çıxıb və o vaxtdan bəri onu görən olmayıb. 18 gün sonra isə məlum olub ki, Bəturə Məmmədovanı soyublar və vəhşicəsinə qətlə yetiriblər.

Bəturənin atası Babək Məmmədov deyir ki, onlar qohumları ilə birlikdə Bəturənin bütün hərəkət marşrutunu izləyiblər. Yoxa çıxmazdan qabaq kimlərlə təmasda olduğunu öyrəniblər və qiymətli şahid ifadələri əldə ediblər. Məlum olub ki, qadın işdən çıxandan sonra fərdi sərnişindaşıma ilə məşğul olan sürücünün avtomobilinə əyələşib.

"Biz hətta kənddən şahidlər tapdıq ki, hər şeyi gözləri ilə görmüşdülər. Onlar qadının necə qışqırdığını, "kömək edin, öldürürlər” dediyini eşidiblər. Onlar bizə hətta maşının nömrəsini də dedilər. Sonra biz şahidlərin danışdıqlarını polisə çatdırdıq. Dedilər axtarırıq, axtarmaqda davam edəcəyik. Amma dedilər ki, belə maşın yoxdur, tapılmayıb”-atası danışır.

Bəturənin qohumları anlaşılmazlıq içində idilər, çünki onlar polisə Bəturəni aparan maşının nömrəsini, ehtimal olunan cinayətkarların əlamətlərini demişdilər. Ancaq iş ölü nöqtədən tərpənmirdi. Nəhayət onlar çarəsiz qalaraq Azərbaycanın Qazaxıstandakı səfirliyinə müraciət ediblər. Səfirliyin işə qarışmasından sonra polis tezliklə işin üstünü açıb.

"Bir sutka ərzində tapdılar. Hansı ki, 15 gündür bizə deyirdilər axtarırıq, tapa bilmirik.İliysk rayon polisində də belə demişdilər. Belə çıxır ki, biz səfirliyə müraciət etməsək onlar heç bir cinayət işi qaldırmağa hazırlaşmırdılar”,-Babək Məmmədov deyir.

Belə məlum olub ki, qadını onun icarəyə götürdüyü taksidə soyğunçuluq məqsədi ilə öldürüblər. Cinayəti törədənlər isə Almaatadan olan ər-arvaddır. Belə ki, ər kirayəyə götürdüyü avtomobillə guya taksi xidməti göstərmək adı altında potensial qurbanlar axtarırmış, arvadı isə özünü müştəri kimi qələmə verirmiş ki, potensial qurban qurulmuş tələdən duyuq düşməsin.

Onlar müştəri kimi maşına oturan Bəturənin üstündəki pulu və qızıları götürüblər, qadını soyuqqanlı şəkildə öldürüblər və cansız bədənini bütün Almatadan keçməklə İliysk rayonundan Almata vilayətinin Karasay rayonuna aparıblar. Orada cəsədi Bereke qəsəbəsi yaxınlığında basdırıblar. Ekspert-kriminalistlər qurbanın bədənində 8 bıçaq yarası aşkar ediblər.

Bəturə Məmmədovanın cənazəsini dəfn olunmaq üçün Azərbaycana göndəriblər. O, Qazaxıstan vətəndaşlığı almaq arzusu ilə yaşayırmış. İş yoldaşı Akmarjan Rskaliyeva deyir ki, Bəturə istiqanlı, hamıya kömək etməyə çalışan və özünə karyera qurmaq istəyən, plastik cərrah olmağı arzulayan qadın idi...