2019-cu ildə ölkəmizin nəqliyyat infrastrukturunda ciddi yeniliklərin baş verdiyi, bir sıra nəqliyyat mübadilə mərkəzinin istifadəyə verildiyi, kart sisteminə keçidin genişləndirildiyi, avtobus parkının əsaslı dərəcədə yeniləndiyi və s. hər kəsə bəlli olan faktlar sırasındadır. Bəs mütəxəssislər baş verənləri iqtisadi aspektdən necə dəyərləndirir? Nəqliyyat sektorunda həyata keçirilən dəyişikiklər, Bakı Nəqliyyat Agentliyinin gerçəkləşdirdiyi layihələr ölkə iqtisadiyyatına konkret olaraq nə qazandırır?

Unikal.org xəbər verir ki, moderator.az-a açıqlama verən iqtisadçı alim Vüqar Bayramov ötən il bu sahədə görülən işlərin mühüm əhəmiyyətə malik olduğunu vurğuladı:

“İctimai nəqliyyat sektorunda infrastrukturun genişləndirilməsi, avtobus parkının yeniləşməsi vacib idi. Etiraf etməliyik ki, son illər biz həm nəqliyyat infrastrukturunun inkişafını, həm də yeni avtobus və xidmət standartlarının tətbiqini müşahidə edirik.

Əvvəlki illərdə ictimai nəqliyaytla bağlı əsas problemlərdən biri həm avtobusların köhnə olması, həm nəqliyyatda xidmət səviyyəsinin aşağı olması, həm də ictimai nəqliyyatda yalnız nağd ödənişlərdən istifadə ilə bağlı idi. Son illər praktiki olaraq bu sahəyə daha çox sərmayənin yönəldilməsi həm infrastrukturun təkmiləşməsinə imkan yaratdı, həm də yeni avtobusların alınması, onlardan istifadə ictimai nəqliyyatda xidmət səviyəsinin artırılmasına səbəb oldu.

Ictimai nəqliyyatda inkişaf ümumdaxili məhsul artımı baxımından da vacibdir. Inkişaf etmiş ölkələrdə həm tıxacların azaldılmasının iqtisadiyyata təsiri, həm də ictimai nəqliyyatda xidmət səviyyəsinin təkmilləşməsi və genişlənməsinin, nağdsız ödənişlərdən istifadənin  genişlənməsinin büdcə gəlirlərinin formalaşmasına birbaşa təsiri var.

Bakıda da nağdsız hesablaşmalardan istifadə genişlənməkdədir. Nağdsız hesablaşmalardan istifadənin genişlənməsi dövriyyənin leqallaşmasına imkan yaradır. Bu isə büdcəyə daha çox vəsaitin cəlb edilməsinə zəmin formalaşdırır. Bu, imkan verir ki, dövlət büdcəsinə ictimai nəqliyyatın dövriyyəsindən daha çox vəsait cəlb edilsin. Infrastruktutun inkişafının ümumdaxili məhsula, yəni bütövlükdə iqtisadiyyata təsiri var.

Avtobus parkının yenilənməsi, yeni xidmətlərdən istifadə xüsusilə Bakı şəhəri üçün mühüm əhəminiyyətə malikdir və bu, büdcə gəlirlərinin artmasına birbaşa təsir göstərir”.