Bir sıra siyasi partiya lideri və ictimai xadimlər Prezident Administrasiyasına və digər aidiyyatı dövlət qurumlarına  professor Cəmil Həsənliyə və ailə üzvünə qarşı törədilən, "video" cinayətkarlığına aydınlıq gətirilməsini, göstərilən rəzil cinayətin təşkilatçı və icraçılarının ən tez bir zamanda tapılıb, cəzalandırılması məzmununda müraciət ünvanlayıblar.

Unikal.org xəbər verir ki, bunu Pənah Hüseyn öz "Facebook" səhifəsində paylaşıb.

Prezident Administrasiyası müraciətə cavab olaraq bildirib ki, bu cinayətdə hər hansı dövlət orqanının iştirakından qəti şəkildə söz gedə bilməz, əksinə, bu hadisə dövlətə və iqtidara qarşı, xüsusən müxalifət-iqtidar münasibətlərinin normallaşması və taməhatəli siyasi dialoq  kursuna qarşı genişmiqyaslı təxribat hesab edirlər: "Bu təxribatın üstünün açılması üçün ən yüksək səviyyədə tapşırıq verilmişdir və ən tez bir zamanda təqsirkarlar aşkarlanıb bu barədə ictimaiyyətə məlumat veriləcəkdir". 

Daha sonra P.Hüseyn deyib ki, aparılan təhqiqat, ekspertiza göstərir ki, informasiya kirliliyi nəticəsində yaranan ilkin təəssüratlar yanlışdır, videodakı şəxslərin ümumiyyətlə C. Həsənlinin ailə üzvü ilə əlaqəsi olmadığı, "tamaşa" olduğu versiyası yəqinlik qazanmaqdadır: "C.Həsənlinin ailə üzvü də bu barədə açıqlama verərək vidieodakı şəxslərin ona aidiyyatı olmadığını bildirmişdir. Heç şübhəsiz məsələyə cinayətin üstünün açılması və konkret təqsirkarların tapılıb cəzalandırılması nöqtə qoya bilər. Nəzərə alınmalıdır ki, bu məsələ artıq təkcə ayrı- ayrı fərdlərin  yox, həm də dövlətin şərəf məsələsidir".