Rusiyanın Xalq artisti Emmanuil Vitorqan bu gün Heydər Əliyev Sarayında “Həyat davam edir” adlı yeni yubiley monotamaşasını təqdim edəcək. Emmanuil Vitorqan konsertdən əvvəl Fəxri xiyabana gələrək, Ümummilli lider Heydər Əliyevin xatirəsini dərin ehtiramla yad edib, məzarı önünə gül qoyub.

"Unikal" xəbər verir ki, rusiyalı aktyor görkəmli oftalmoloq-alim, akademik Zərifə xanım Əliyevanın da məzarı üzərinə tər güllər düzüb.

O, həmçinin dünyaşöhrətli opera və estrada müğənnisi, bəstəkar, SSRİ Xalq artisti Müslüm Maqomayevin də məzarını ziyarət edib.

Qeyd edək ki, Vitorqanın bakılı tamaşaçılar önündə oynayacağı bu tamaşa onun mərhum həyat yoldaşı – 60 yaşında xərçəng xəstəliyindən dünyasını dəyişmiş Rusiyanın Xalq artisti Alla Balterə həsr olunub.

Rusiyanın teatr və kino aktyoru olan Emmanuil Vitorqan ekran əsərlərində parlaq obrazlar yaradıb. O, bu gün də səhnədə və kinoda yeni koloritli, dərin məzmunlu yaradıcılığı ilə fərqlənən aktyorlardan biridir.