Azərbaycan Dövlət İqtisad Universitetinin (UNEC) yaranmasının 94 illiyi münasibətilə universitetdə təntənəli “UNEC Günü” qeyd olunub.
"Unikal" xəbər verir ki, “UNEC Günü”nün açılışında çıxış edən inzibati və təşkilati məsələlər üzrə prorektor dosent Şaiq Əsgərov universitet rəhbərliyi adından müəllim, tələbə və əməkdaşları təbrik edərək, onlara fəaliyyətlərində uğurlar arzulayıb.
Tədbir çərçivəsində UNEC-in əməkdaşı, tanınmış karikaturaçı rəssam Seyran Cəfərlinin müxtəlif mövzulara həsr olunmuş bir-birindən maraqlı karikatura əsərlərinin sərgisi nümayiş olunub. İştirakçılar tərəfindən böyük maraqla qarşılanan sərginin açılışında ölkənin tanınmış rəssamları da çıxış ediblər. Çıxış edənlər karikatura sənətinin özəlliklərindən və Seyran Cəfərlinin bu sahədə qazandığı uğurlardan söz açıblar. Bildiriblər ki, S.Cəfərlinin dünyanın bir çox ölkələrində fərdi sərgiləri təşkil olunub. Onun əsərləri qızıl, gümüş, bürünc medallara və xüsusi diplomlara layiq görülüb, eləcə də beynəlxalq karikatura yarışmalarında 60-dan çox mükafatla təltif edilib və 200-ə yaxın kataloqda əsərləri çap olunub.
S.Cəfərli uzun illərdən bəri çalışdığı universitetin yarandığı gündə sərgisinin təşkil olunmasından qürur hissi duyduğunu ifadə edərək, universitet rəhbərliyinə və sərginin keçirilməsində əməyi olan hər kəsə təşəkkürünü bildirib.
Çıxışlardan sonra Seyran Cəfərliyə UNEC rəhbərliyinin “Təşəkkürnamə”si təqdim edilib.
Universitetin 94 illiyi münasibətilə UNEC-in sosial-ictimai həyatında fəal iştirak etmiş bir qrup müəllim, əməkdaş və tələbə, eləcə də UNEC Tədqiqat Mərkəzlərinin tədqiqatçıları da təşəkkürnamələrlə təltif olunublar.
UNEC Günü Yaradıcılıq mərkəzinin rəqs və qokal qruplarının ifasında bədii hissə ilə davam edib. UNEC kollektivi 94 yaşını hər il olduğu kimi, bu il də böyük sevinc hissi ilə qeyd edib.
