“Konstitusiya və Suverenlik İli” ilə əlaqədar respublikamızın hər yerində olduğu kimi, Ağstafa rayonunda da silsilə tədbirlər keçirilir. Bununla əlaqədar Ağstafa Rayon İcra Hakimiyyətinin müvafiq Tədbirlər Planına uyğun olaraq keçirilən növbəti ağacəkmə aksiyası rayonun Köçəsgər, Dağ Kəsəmən, Həsənsu, Qırılı, Eynallı Qarahəsənli kəndləri və Vurğun qəsəbəsini əhatə edib.

"Unikal" xəbər verir ki, aksiyada Ağstafa RİH başçısı Seymur Orucov, rayonun hüquq-mühafizə orqanlarının rəhbərləri, İnzibati Ərazi Dairələri üzrə nümayəndəliklərin, “Ağstafaçay” Hidroqovşağı İstismarı İdarəsinin, Ağstafa Su Meliorasiya Sistemlərinin İstismarı İdarəsinin, Ağstafa Dövlət Aqrar İnkişaf Mərkəzinin, rayon Heyvan Sağlamlığı və Baytarlıq Xidmətləri İdarəsinin, Ağstafa Elektrik Şəbəkəsinin, Şəmkir Regional Qaz istismar İdarəsinin Ağstafa Xidmət Sahəsinin, "Aztelekom" MMC Qərb Regional Filialının Ağstafa şöbəsinin əməkdaşları iştirak ediblər.

Aksiya çərçivəsində yerli iqlim şəraitinə uyğun olaraq ümumilikdə 1600 ədəd sərv və küknar tingləri əkilib. Ərazidə abadlıq işləri görülüb və əkilən ağaclara zəruri aqrotexniki qulluq göstərilib. Həmçinin yaşıllıq zonalarında qurumuş ağaclar çıxarılaraq yeniləri ilə əvəz olunublar.

Qeyd olunub ki, aksiyanın keçirilməsində məqsəd ölkəmizin yaşıllaşdırma ənənələrini və əhali arasında təbiətə olan qayğı hissini təbliğ etmək, ictimaiyyətin diqqətini yaşıllıqların qorunmasına yönəltmək, ekoloji tarazlığın bərpası, ətraf mühitin sağlamlaşdırılmasından ibarətdir.