Bakıda keçiriləcək növbəti Formula 1 yarışları ilə bağlı tikinti işləri plana uyğun olaraq gedir, hətta müəyyən olunmuş qrafikdən də sürətli aparılır ki, IV İslam Həmrəyliyi Oyunlarının keçirilməsinə mane olmasın".

Unikal.org xəbər verir ki, bunu trend-ə Bakı Şəhər Halqasının Marketinq və kommunikasiya şöbəsinin rəhbəri Nigar Arpadarai deyib.

Formula 1 yarışlarında bilet satışına gəlincə isə N.Arpadarai bildirib ki, artıq 48 ölkədən biletlər alınıb. O qeyd edib ki, biletlər kifayət qədər yaxşı satılır: "Filarmonia tribunasına biletlər tamamilə satılıb, artıq orada yer yoxdur, digər tribunalara da biletlər yaxşı satılır. Biletlərin qiyməti 60 manatdan 600 manata qədərdir. Həm bahalı, həm də ucuz biletlərdən kifayət qədər satılıb. Keçən ildən fərqli olaraq bu il biletlərin kateqoriyaları çoxdur. Məsələn, keçən il ancaq üç günlük biletlər idisə, bir günlük bilet ancaq cümə günü üçün idisə, indi artıq hər gün üçün ayrıca biletlər var, üç günlük biletlər var, uşaqlar üçün biletlər 30 faiz endirimlə satılır. Yəni indi biletlərin kateqoriyaları çox olduğu üçün insanlara daha rahatdır, özlərinə uyğun olan bileti seçə bilirlər".

VİP biletlərin satışına gəlincə isə N.Arpadarai bildirib ki, bu biletlər Formula 1-in özü tərəfindən satılır: "Formula 1-də tribunalardan başqa "Paddock Club" deyilən bir yer var ki, o, Formula 1 avtomobillərinin dayanacağının üstündə, 2-ci mərtəbədə yerləşir. O yerlərin qiyməti kifayət qədər bahadır və o biletləri Formula 1 özü satır. Bütün dünyada qayda belədir. Həmin biletləri daha çox iş adamları, şirkətlər alır. Qiyməti hər yerdə standart olur, təqribən 5 min dollara yaxındır".