"Çağırışımıza səmimi cavab verməyən ölkələrin Türkiyənin atacağı addımlara reaksiyasını nəzərə almayacağıq"

"Bizə dost olaraq görünənlər PKK, PYD, YPG adı altında qurulmuş və qurulacaq terror təşkilatlarının qurumların nə olduğunu bildikləri halda bizim gözümüzün içinə yalan söyləyirlər. Qərb bir terror təşkilatını yanına alaraq, guya digər terror təşkilatı olan İŞİD-lə mübarizə adı altında bölgəni yeni dizayn etməyə çalışır".

Unikal.org xəbər verir ki, bunu bu gün Türkiyə prezidenti Rəcəb Tayyib Ərdoğan sədri olduğu Ədalət və İnkişaf Partiyasının (AKP) İstanbulda keçirilən rayon təşkilatlarının toplantısında bəyan edib.
R. T. Ərdoğan Türkiyənin ərazi bütövlüyü və müstəqilliyi olan bir yerdə ticarət kimi məsələlərin əhəmiyyətini itirdiyini vurğulayıb: "Referendum dönəmində Türkiyə prezidentinə, AKP rəsmilərinə Almaniyanın qapılarını bağladılar. Hollandiyada xanım nazirimizə qarşı hörmətsizlik sərgiləndi. Almaniyanın xarici işlər naziri də mənə qarşı həddini aşıb. Sən kimsən ki, Türkiyə prezidentinə söz deyirsən?! Mən bir daha deyirəm ki, Almaniyadakı türklər Türkiyə düşməni olan partiyalara parlament seçkilərində səs verməyin, Almaniyada Türkiyəyə dost olan partiyalara səs verin. Məncə, Türkiyəyə qarşı düşmənçilik edən partiyalar Almaniyada yaxın vaxtlarda keçiriləcək parlament seçkilərində lazımi cavabı alacaqlar. Deyirlər ki, mən Almaniyanın daxili işlərinə qarışıram. Mən terrorçuları sizin kimi yanıma almıram, sığınacaq vermirəm. Türkləri demokratik hüquqlarından istifadə etməyə çağırıram. Bu gün terrorçuların, FETÖ-nün meydan suladığı yerlər Almaniya, o cümlədən ABŞ-dır. Onların məhkəməsi varsa, bizim də məhkəmələrimiz var.".
Türkiyənin Suriyada PYD/YPG terror təşkilatına qarşı yaxın vaxtlarda əməliyyata başlanacağı mesajını verən R. T. Ərdoğan deyib ki, ölkəsinin Suriya ilə 900 km, İraq ilə 384 km sərhədi var: "ABŞ İraqdan 100 yük maşını ağır silahlar, texnika gətirdi, PYD/YPG və digər müxtəlif terror təşkilatlarına verildi. Guya terror təşkilatına qarşı mübarizə aparacaqlar. Bəs sonra nə olacaq? ABŞ-ın PYD/YPG və digər terror təşkilatlarına verdiyi texnika və silahdan Türkiyəyə qarşı istifadə edəcəklər. Mən bunu ABŞ prezidenti Donald Trampla görüşdə demişdim. Həmin texnika və silahların terror təşkilatlarından geri alınmasını istəyirik. Biz bu çağırışımıza səmimi cavab verməyən ölkələrin bundan sonra Türkiyənin atacağı addımlara reaksiyasını nəzərə almayacağıq. Biz sadəcə, terror təşkilatları, terrorçularla mübarizə aparırıq. Terrorçuların arasında olanla bizim üçün terrorçudur. Suriya və İraq məsələsində son sözümüz budur. Yaxın günlərdə atacağımız addımlar dəqiqləşəcək. Türkiyənin müvafiq qurumları buna uyğun hazırlıqlarını aparır".