Dövlət Komitəsində Böyük Britaniya XİN-in Şərqi Avropa və Mərkəzi Asiya Direktoratlığının rəhbəri ilə görüş keçirilib.

Unikal.org-a  verilən məlumata görə, iyunun 11-də Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayevlə Böyük Britaniya Xarici İşlər Nazirliyinin Şərqi Avropa və Mərkəzi Asiya Direktoratlığının rəhbəri Rupert Eynli arasında görüş keçirilib.

Dövlət Komitəsinin sədri Ermənistanın Azərbaycan ərazilərini işğal etməsi nəticəsində öz doğma torpaqlarından didərgin düşən 1 milyondan çox məcburi köçkünün sosial problemlərinin həlli, mənzil-məişət şəraitinin yaxşılaşdırılması ilə bağlı görülən işlər barədə qonağa ətraflı məlumat verib.Bildirilib ki, Prezident İlham Əliyev tərəfindən qaçqın və məcburi köçkünlərin sosial problemlərinin həlli, mənzil-məişət şəraitinin yaxşılaşdırılması istiqamətində əhəmiyyətli addımlar atılır. Birinci vitse-prezident xanım Mehriban Əliyeva tərəfindən də bu istiqamətdə ardıcıl və məqsədyönlü tədbirlər həyata keçirilir. Bütün bunların nəticəsində 300 minə yaxın məcburi köçkün yeni mənzillərlə təmin olunub.

Qeyd edilib ki, Cəbrayıl rayonunun Cocuq Mərcanlı kəndindən olan məcburi köçkünlərin öz evlərinə qayıtması ilə artıq respublikanın müxtəlif bölgələrində müvəqqəti məskunlaşmış sakinlərinin doğma yurda qayıdışı başlayıb.Azərbaycan Prezidenti İlham Əliyevin Cocuq Mərcanlının bərpası ilə bağlı Sərəncamına əsasən, kənddə birinci mərhələdə 50 ev tikilib istifadəyə verilib. İkinci mərhələdə tikilən 100 yaşayış evindən 50-ə kəndin, respublikanın müxtəlif yerlərində məskunlaşmış sakinləri köçürülüb. Məcburi köçkünlərin Cocuq Mərcanlıya qayıdışı davam edir.

Böyük Britaniya Xarici İşlər Nazirliyinin Şərqi Avropa və Mərkəzi Asiya Direktoratlığının rəbəri Rupert Eynli səmimi qəbula görə təşəkkürünü bildirib. Böyük Britaniya dövlətinin Azərbaycanla strateji əməkdaşlığın möhkəmləndirilməsinə mühüm əhəmiyyət verdiyini, ölkəsinin humanitar təşkilatlarının bundan sonra da Azərbaycanda məcburi köçkünlərlə bağlı layihələrin həyata keçirilməsində maraqlı olduğunu deyib.

Görüşdə qarşılıqlı maraq doğuran məsələlər müzakirə edilib.