"18 iyun İnsan hüquqları Gününə həsr olunmuş dinləmələr ölkəmizdə mühum beynəlxalq təbdir ərəfəsində keçirilir. Sabah Azərbaycanda Formula1 qran-pri yarışları start götürür ki, bu da möhtəşəm Birinci Avropa Oyunlarından sonra növbəti nüfuzlu yarışın ölkəmizə həvalə olunması, Azərbaycanın uğurlarının beynəlxalq ictimaiyyət tərəfindən qəbulunun, etirafının göstəricisidir".
Unikal.org xəbər verir ki, bunu Milli Məclisdə parlamentin İnsan hüquqları komitəsinin təşəbbüsü ilə "18 iyun Azərbaycan Respublikasında İnsan huquqları Günü" mövzusunda dinləmələrdə Prezident Administrasiyasının (PA) ictimai-siyasi şöbəsinin müdiri Əli Həsənov deyib. O, qeyd edib ki, bu il oktyabrında Azərbaycanın müstəqilliyinin 25 ili, həmçinin, BMT-nin insan hüquqları ilə bağlı ən mühüm sənədlərindən birinin qəbulunun 50 ili tamam olur.
PA rəsmisi sonra bildirib ki, bunu elə-belə xatırlatmayıb, yəni, müstəqilliyinin 25 ilini arxada qoymaq ərəfəsində olan Azərbaycanın müstəqilliyinin ilk illəri çox ağır və gərgin olub. Onun sözlərinə görə, həmin illərdə və günlərdə Azərbaycanda insan hüquqlarının kütləvi və qəddar şəkildə pozulması müşahidə olunub: "Yəni, Ermənistanın Azərbaycan torpaqlarını işğal etməsi, soyqırımlar həyata keçirməsi, bir milyondan artıq insanımızı qaçqın və köçkün salması buna misaldır. Ancaq çox təəssüflər olsdun ki, insan hüquqları məsələsini əldə bayraq edən bəzi beynəlxalq təşkilatlar hələ də insanlarımızın hüquqlarının kütləvi şəkildə pozulması faktına ədalətli və adekvat qiymət vermirlər. Həmçinin, Ermənistan qarşı sanksiya tətbiq etməkdən və digər təsirli addımlar atmaqdan çəkinirlər..."-deyə, Ə. Həsənov sözlərinə əlavə edib.
* * *
"Müstəqillik yalnız xalqımızın dövlətçilik arzularının yerinə yetirilməsi deyil, insan hüquqları sahəsində mühüm nailiyyətdir".
Bunu bu gün Milli Məclisin İnsan hüquqları komitəsinin "18 İyun Azərbaycan Respublikasında İnsan Hüquqları Günü" ilə əlaqədar parlamentdə təşkil etdiyi dinləmələr zamanı "İnsan hüquq və azadlıqlarının təmin olunması Azərbaycan dövlətinin ali məqsədidir" mövzusunda çıxış edən Azərbaycan prezidentinin İctimai-siyasi məsələlər üzrə köməkçisi Əli Həsənov deyib.
Ə. Həsənov bildirib ki, Ermənistan Azərbaycana qarşı ərazi iddiaları irəli sürərək Dağlıq Qarabağ və ətraf 7 rayonu işğal edib, soyqırımı törədib, 1 milyon insanı qaçqın və məcburi köçkün vəziyyətinə salıb, insan hüquqlarını kütləvi surətdə pozub: "Təəssüf ki, beynəlxalq təşkilatlar təcavüzkar Ermənistana qarşı sanksiyalar tətbiq etməkdən hələ də çəkinir".
Azərbaycan prezidentinin köməkçisi deyib ki, Heydər Əliyevin hakimiyyətə gəlməsi ilə xaos aradan qaldırılıb, sabitlik bərpa edilib: "Bu dövrdən başlayaraq, beynəlxalq sənədlərdə insan hüquqları ilə bağlı prinsiplər nəzərə alınmaqla, qanunlarımız qəbul edilib. Bu sahədə əsas qanunumuz Konstitusiyadır. Konstitusiyada insan hüquq və azadlıqlarının təminatı, sosial, mədəni və digər hüquqlar, söz, fikir azadlıqları təsbit olunub. 1998-ci il iyunun 18-də İnsan hüquqlarının müdafiəsinə dair Dövlət Proqramının qəbul edilməsi də mühüm addım idi. Proqramda Ombudsman İnstitutunun yaradılması və digər məsələlər əksini tapıb. Sonradan prezident İlham Əliyevin 2007-ci ildə imzaladığı sərəncamla İnsan Hüquqları Günü kimi qəbul edilib. 2006 və 2011-ci ildə insan hüquqları ilə bağlı növbəti dövlət proqramları qəbul edilib. 2025-ci ilə qədər dövrü əhatə edən İnkişaf Konsepsiyasında da insan hüquqlarının təmin edilməsi ilə bağlı mühüm məsələlər əksini tapıb. İnsan hüquqları söz və sərbəst toplaşmaq azadlığı ilə bağlıdır. Sərbəst toplaşmaqla bağlı yerli icra hakimiyyəti orqanları rayonlarda açıq və qapalı yerlər müəyyən edilib. Azərbaycanda çoxlu sayda partiya, QHT, mətbuat orqanı fəaliyyət göstərir. Hər il dövlət büdcəsində partiyaların maliyyələşməsinə 2,5 milyon vəsait ayrılır. Venesiya Komissiyası siyasi partiyalarla bağlı qanunvericiliyə maliyyələşmə sahəsində edilən dəyişikliyi müsbət qiymətləndirib".
Vətəndaş cəmiyyətinin inkişafı ilə bağlı qəbul edilən qanun və qərarlardan söz açan Ə. Həsənov qeyd edib ki, ölkədəki QHT-nin əksəriyyəti insan hüquq və azadlıqları sahəsində ixtsaslaşıb: "2008-ci ildə fəaliyyətə başlayan Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası QHT-lərə ciddi dəstək verir. Gənclər Fondu gənclər təşkilatlarının, gənclərinin layihələrinə dəstək göstərir. Azərbaycanda ümumilikdə 15 dövlət orqanı QHT-nin layihələrinə dəstək verir, vəsait ayırır. Keçən ildən başlayaraq icra orqanları yanında İctimai şuralar yaradılmasına başlanılıb. Bu qurumlarda QHT-lər, fəal jurnalistlər təmsil olunur. Konstitusiyada KİV üzərində senzuranın yolverilməzliyi təsbit olunub. 1999-cu ilin dekabrında KİV haqqında qanun qəbul olunub, növbəti illərdə qanunun Avropa Konvensiyasına uyğunlaşdırılması istiqamətində dəyişikliklər edilib. Hazırda Azərbaycanda qəzet və jurnal nəşr etmək çox asandır. Təsis sənədlərini Ədliyyə Nazirliyinə təqdim etməklə 7 gün sonra nəşrə başlamaq olar".
Mətbuat Şurası , Milli Televiziya və Radio Şurasının yaradılmasından bəhs edən Ə. Həsənov nəzərə çatdırıb ki, prezident İlham Əliyev medianın inkişafına diqqətlə yanaşır, KİV-in qlobal məkana inteqrasiyasına daim dəstək verir: "2009-cu il aprelin 3-də Azərbaycan Respublikasının Prezidenti yanında Kütləvi İnformasiya Vasitələrinə Dövlət Dəstəyi Fondu yaradılıb. Fond tərəfindən ötən dövr ərzində medianın inkişafına 30 milyon manat ayrılıb. Azərbaycan KİV-in sayına görə MDB və Avropa məkanında lider ölkələrdən hesab olunur. 5 mindən çox KİV qeydiyyatdan keçib, 50-dən çox televiziya və radio, çoxlu sayda yayım orqanları fəaliyyət göstərir. Hazırda əhalinin 75 faizi hər gün internetdən istifadə edir, sosial şəbəkə istifadəçilərin sayı 1,2 milyon nəfəri ötüb". (APA)
* * *
Prezidentin ictimai-siyasi məsələlər üzrə köməkçisi Əli Həsənov medianı məsuliyyətli olmağa dəvət edib.
Parlamentdə insan haqları ilə bağlı dinləmələrdə çıxış edən Əli Həsənov bu yaxınlarda onunla bir nazirin arasında olan dialoq haqqında danışıb.
"Bu günlərdə bir nazir mənə zəng edərək qəzetlərdən birində onun təhqir olunduğunu bildirdi.
Həqiqətən də həmin yazı başdan-ayağa böhtan idi. Mən də ona təklif etdim ki, məhkəməyə müraciət etsin. O da dedi ki, "işimi gücümü atıb məhkəməyə müraciət etməyəcəm ki...".
Prezidentin köməkçisi sonradan həmin jurnalistin adının daha 15 məhkəmə işində hallandığını bildirib.
"Sonra maraqlanıb öyrəndik ki, həmin jurnalist haqqında ən azı 15 məhkəmə işi var. Nə edək, bu adam özünü dəlioğlanlığa vurub. Azərbaycanda məmurun məsuliyyəti olduğu kimi, jurnalistlərin də məsuliyyəti var və bu məsələlərdə hər kəs öz məsuliyyəti çərçivəsində hərəkət etməlidir"-deyə Əli Həsənov bildirib.
