AVRO-2020-də ikinci oyun günü başa çatıb.

Unikal.org saytının məlumatına görə, B qrupunda I tura Sankt-Peterburqda yekun vurulub. Rusiya yığması çempionatın favoritlərndən olan Belçika ilə üz-üzə gəlib. Roberto Martinesin yetirmələri qarşılaşmanın taleyini ilk yarıda həll edib.

Öncə Romelu Lukaku erkən qola sevinib. Belçikalı bu qolu “İnter”dəki komanda yoldaşı, Danimarka millisinin huşunu itirən futbolçusu Kristian Eriksenə həsr edib. Ardınca Tomas Menye fərqi iki topa çatdırıb.

İkinci hissədə də üstünlüyə sahib olan belçikalılar qarşılaşmaya tam nəzarət edib. Lakin FİFA reytinqinin lideri hesabı yalnız matçın sonlarında dəyişə bilib. AVRO-2020-nin ilk dublunun müəllifi olan Lukakunun qolu böyükhesablı qələbəni rəsmiləşdirib.

Qeyd edək ki, qrupun digər oyununda da AVRO-2020-nin ev sahiblərindən olan komanda məğlubiyyətlə üzləşib. Danimarka Finlandiyaya 0:1 hesabı ilə uduzub.