Cümə axşamı Almaniyanın paytaxtı Berlində təxminən 9 saat davam edən Rusiya-Ukrayna danışıqları birgə sənədin imzalanmasında irəliləyişə səbəb olmasa da, tərəflər danışıqları davam etdirməyə razılaşıblar. 

"Unikal" xəbər verir ki, bu barədə Berlində danışıqlarda iştirak edən Ukrayna prezidentinin aparat rəhbəri məlumat yayıb.

Qeyd edək ki, Ukrayna və Rusiya hökumətlərinin yüksək rütbəli nümayəndələri Ukraynanın şərqində münaqişəyə son qoymaq naminə danışıqlarda iştirak etmək üçün Almaniyanın paytaxtında bir araya gəliblər.

Ukrayna prezidenti Vladimir Zelenskinin aparat rəhbəri Andrey Yermak jurnalistlərə deyib ki, tərəflər yəqin ki, tezliklə yenidən görüşəcək. 

Rusiya bəyan edib ki, Ukrayna, Fransa və Almaniya ilə danışıqların son raundu Ukraynadakı münaqişənin həlli ilə bağlı yeni razılaşmaya gətirib çıxarmayıb. Rusiya prezidentinin aparat rəhbərinin müavini Dmitri Kozakın sözlərinə görə, Minsk razılaşmalarının təfsiri ilə bağlı fikir ayrılıqlarını aradan qaldırmaq mümkün olmayıb.

Ağarza Elçinoğlu