Azərbaycan Əmək və Sosial Münasibətlər Akademiyasında Ulu öndər Heydər Əliyevin anadan olmasının 100 illiyinə  həsr olunmuş “Heydər Əliyev müasir Azərbaycan dövlətinin qurucusudur” mövzusunda hibrid formatda Beynəlxalq elmi konfrans keçirilib. 

"Unikal" xəbər verir ki, Azərbaycan Əmək və Sosial Münasibətlər Akademiyasının rektoru, professor Hüseyn Qaraşov tədbiri açıq elan edərək Ulu öndərin Azərbaycanın inkişafı və tərəqqisinə, xalqın rifahının yüksəlməsinə həsr olunmuş  siyasi fəaliyyəti haqqında ətraflı məlumat verib. 
Konfransa 11 dövləti təmsil edən 27 təşkilatdan 58 iştirakçı qatılmışdır. İştirakçılar məruzələrində  Ulu öndərin dəmir məntiqə əsaslanan siyasi kursu, düşünülmüş dövlətçilik fəlsəfəsi, demokratik və milli-mənəvi dəyərlərin qorunmasındakı təkrarolunmaz rolu, Azərbaycan torpaqlarının işğaldan azad olunmasında yorulmaz mübarizəsi və qətiyyətli mövqeyi,  azərbaycançılıq ideyasının  geniş yayılmasındakı və ictimai həyat sahələrinin sistemli inkişafındakı misilsiz xidmətləri geniş təhlil edilmişdir. Konfrans  ayrı-ayrı panellərdə davam etdirilmişdir.