"Bu gün tibbi tullantıların toplanması, çeşidlənməsi, nəqli və məhv edilməsi sahəsində problem var".

"Unikal" xəbər verir ki, bunu Milli Məclisin Səhiyyə komitəsinin sədri Əhliman Əmiraslanov parlamentdə “Tibbi tullantıların idarə olunması” mövzusunda keçirilən ictimai dinləmədə deyib. 

O bildirib ki, bu gün cəmiyyəti ən çox narahat edən problem tullantı məsələsidir: “Bu gün tullantılar günbəgün artır. Həmçinin, tullantıların emal məsələsi də hələ öz həllini tapmayıb. Bakıda bu sahədə bir sıra işlər görülsə də, bölgələrdə hələ də problem qalıb. Ümumiyyətlə, xəstə ilə təmasda olan hər şey tibbi tullantı adlanır. Tibbi tullantılar epdemioloji nöqteyi-nəzərdən böyük təhlükəlidir. Çox sayda tullantının atılması milyardlarla patogen bakteriya və virusun mənbəyidir. Xəstəliklər düzgün idarə olunmasa, xəstəliklərin yayılmasına şərait yaratmış olar. Tullantılar arasında tibbi tullantılar xüsusi yer tutur. Digərləri ilə müqayisədə bunun təhlükəli və mənfi təsirləri çoxdur”.