Gürcüstanın baş naziri İrakli Kobaxidze Aİ diplomatiyasının rəhbəri Josep Borrellin tənqidinə cavab verib. 

"Unikal" xəbər verir ki, bu barədə Gürcüstan mətbuatı yazıb. 

Baş nazir Gürcüstanı Moldova ilə mənfi kontekstdə müqayisə etməyi təhqiredici hesab edib: "Bu bəyanatlar müvəqqətidir, biz bu bəyanatlara xüsusi əhəmiyyət verməyəcəyik... Gürcüstanla Moldovanı müqayisə etməyə gəlincə, bilirsiniz ki, Gürcüstan istər demokratiya, istər insan haqları, istərsə də iqtisadiyyat baxımından Moldovanı bütün aspektlərdə qabaqlayır". 

Onun sözlərinə görə, Gürcüstan iqtisadiyyatı Moldova iqtisadiyyatını 9 milyard dollar üstələyir və bu, digər məsələlərlə yanaşı, Gürcüstanın Moldovadan fərqli olaraq çox güclü dövlət institutlarına malik olması ilə bağlıdır. Eyni zamanda, Gürcüstanın baş naziri bildirib ki, Moldovada siyasi plüralizm və ya media plüralizmi yoxdur: "Demokratiya və insan haqlarına gəlincə, xatırlamaq lazımdır ki, Moldovada siyasi partiyalar və media qadağan edilib, əslində bütün ölkədə yayımlanan cəmi iki media orqanı var: ictimai yayımın birinci kanalı və ikinci kanal".

Borrell dünən deyib ki, Moldova ilə müqayisədə Gürcüstanda mənzərə qaranlıqdır. Onun sözlərinə görə, Gürcüstanın hakim partiyasının hərəkətləri, bəyanatları və seçkiqabağı vədləri ölkəni Avropa yolundan uzaqlaşdırır və avtoritarizmə keçidi göstərir, buna görə də Aİ-yə üzvlük prosesi faktiki olaraq dayandırılıb.

Ağarza Elçinoğlu