İtaliyanın Milan şəhərinin ev sahibliyi etdiyi 75-ci Beynəlxalq Astronavtika Konqresində azərbaycanlı tələbələrin elmi sessiyaları davam edir.

"Unikal" xəbər verir ki, konqresin “Dayanıqlılıq naminə kosmik məsuliyyət” mövzusuna uyğun olaraq gənclər əsasən biomühəndislik bitkiləri ilə mikro qravitasiya mühitində karbonun idarə olunması, kosmik mühitin insan bədəninə təsiri, kosmosda fizioterapiya, kosmosda hüquqi tənzimlənmə qaydaları, kosmosda həyat elmləri, peyklərin missiyası və yerin müşahidəsi mövzularında elmi çıxışlar edir, öz araşdırma və yanaşmalarını təqdim edirlər.

Milan Konqresində 200 texniki sessiyada 2400-ə yaxın elmi məqalə təqdim olunur. 50-yə yaxın tələbə, gənc mütəxəssis və alimdən ibarət milli elmi komanda konqres vasitəsilə bu sessiyalarda müxtəlif ölkələrdən olan gənclərlə ünsiyyət qurur, kosmosun gələcəyi barədə fikir mübadiləsi apara bilir.

Xatırladaq ki, milli elmi komanda Azərkosmosun KOSMİK Akademiyasının təşkilatçılığı, Elm və Təhsil Nazirliyi yanında Elm və Ali Təhsil üzrə Dövlət Agentliyinin SABAH qrupları və İnnovasiya və Rəqəmsal İnkişaf Agentliyinin dəstəyi ilə qlobal platformada ölkəmizi təmsil edir.

Qeyd edək ki, Milan Konqresinə 120 ölkədən 11,000-dən çox iştirakçı qatılıb. Konqresin sərgi pavilyonunda Azərbaycanın Kosmik Agentliyi ilə yanaşı, Avropa Kosmik Agentliyi, ABŞ-nin Milli Aeronavtika və Kosmik Tədqiqatlar Agentliyi (NASA), Türkiyə, Böyük Britaniya, İtaliya, Birləşmiş Ərəb Əmirlikləri, Hindistan, Yaponiya, Almaniya və digər ölkələrin kosmik qurumları iştirak edirlər.

Milan Konqresi innovasiya, kosmosda dövlət-özəl tərəfdaşlığı, NASA-nın “Artemis Accords” Ay missiyası, kosmik kəşflər: Aydan Marsa doğru, kosmosda tibbi araşdırmalar, kosmosda biznes və investisiya, sahibkarlıq, kosmik iqtisadiyyat, kosmik resursların dəyəri haqqında interaktiv sessiyalar və zəngin proqramlarla bu həftə dünyanın yeni kosmik tendensiyalarını gündəmdə saxlayır.