“Barselona”nın futbolçusu Lionel Messi yenidən zədələnib.

Unikal.org xəbər verir ki, bir müddət əvvəl zədə səbəbi ilə La Liqanın ilk 5 turunu buraxan argentinalı oyunçu, sağaldıqdan sonra 6-cı turun “Vilyarreal”la görüşündə (2:1) əsas heyətdə meydana çıxmışdı.

Qarşılaşmanın 46-cı dəqiqəsində sol ayaq əzələsini dartan Messi, meydanı tərk etmişdi. “Barselona”nın rəsmi saytı Messinin yenidən zədələndiyini açıqlayıb. 32 yaşlı oyunçunun sağalma müddəti isə bilinmir.

İspaniya mətbuatının xəbərinə görə, Messi La Liqanın 7-ci turunda “Xetafe” ilə oyunu buraxacaq. Argentinalının Çempionlar Liqasının qrup mərhələsinin 2-ci turunun “İnter”lə matçında iştirakı isə sual altındadır.

“Barselona” sentyabrın 28-də “Xetafe”, oktyabrın 2-də isə “İnter”lə qarşılaşacaq.