Suqovuşan (Madagiz) kəndi əvvəllər Dağlıq Qarabağ Muxtar vilayətində Ağdərə rayonunun inzibati ərazisinə aid idi. Lakin 1992-ci ildə Ağdərə rayonu ləğv edilərək ərazisi qonşu Ağdam rayonu Tərtər və Kəlbəcər rayonu arasında bölüşdürüldü. Suqovuşan (Madagiz) kəndi də Tərtər rayonuna birləşdirilən kəndlərdən biridir. Düşmən bu istiqamətdən Tərtəri artilleriya atəşinə tuturdu. Bu ərazi strateji baxımdan “Qarabağın açarı” hesab olunur. Çünki Murovdağ silsiləsinin cənub yamacı ilə Sərsəng gölünə yol buradan keçir. Madagizin alınması ilə Murov, Kəlbəcər, Tərtər yolu tamamilə kəsilir və Ağdam şəhərinin azadlığına yol açılır.

Unikal.org xəbər verir ki, hərbi ekspert Şair Ramaldanov “ATV Xəbər”ə açıqlamasında SuqovuşanIN (Madagiz) strateji əhəmiyyətindən danışıb.

O bildirib ki, Madagizdə çoxlu düşmən ehtiyatları, texnika, idarəetmə məntəqələri var idi:

“Suqovuşan (Madagiz) çox vacib bir istiqamətdi: həm Ağdərə, həm Sərsəng, həm də Kəlbəcər istiqaməti üçün. Oradan gələn yol nəzarət altında olur. Həm taktiki, həm strateji, həm əməliyyat cəhətdən çox vacib mövqedir. Çox vacib yaşayış məntəqəsidir. Bu yaşayış məntəqəsi Azərbaycan Silahlı Qüvvələrinin irəliləməsinə və ətraf əraziləri nəzarət altında saxlamağa çox böyük imkan yaradır”.