Türkiyənin müdafiə naziri Hulusi Akar Yunanıstanı Ankaraya qarşı düşmənçilik siyasəti yürütməkdə və hər iki ölkənin daxil olduğu NATO -nun əsas prinsiplərini pozmaqda ittiham edib.

"Unikal" xəbər verir ki, nazir bildirib ki, Yunanıstan vəziyyətin sabitliyinin pozulmasına gətirib çıxaran təxribat xarakterli hərəkətlərini, aqressiv və ekspansionist siyasətini davam etdirir. O qeyd edib ki, bunun ən son nümunəsi NATO təlimlərində iştirak edən və göyərtəsində silahı olmayan Türkiyə təyyarəsinin Yunanıstan tərəfindən radar vasitəsilə tutulmasıdır.

Akar, "Yunanıstanın NATO daxilində uçuşların qarşısını almaq üçün atdığı addımlar düşmənçilik xarakteri daşıyır və NATO-nun əsas prinsiplərinə hörmət etmədiyini göstərir" deyə nazir bildirib.

O, həmçinin Yunanıstanı iki dövlət arasında mövcud problemləri Şimali Atlantika Alyansındakı müttəfiqlər vasitəsilə deyil, dialoq yolu ilə həll etməyə çağırıb.

Bundan əvvəl Türkiyə Müdafiə Nazirliyi bildirmişdi ki, Yunanıstan aviasiyası NATO missiyası çərçivəsində Egey dənizi üzərində uçan Türkiyə Hərbi Hava Qüvvələrinə məxsus təyyarələrin qarşısını almağa cəhd edib. 

Türkiyə ordusunun məlumatına görə, NATO-nun NEXUS ACE Ege missiyası çərçivəsində keçirilən təlimlər barədə 24 saat ərzində Yunanıstan da daxil olmaqla bütün NATO ölkələri məlumatlandırılıb. Bununla belə, “Türkiyə F-16-larının qarşısını almaq cəhdi olub”.