Azərbaycan Prezidenti İlham Əliyev ötən gün Almaniya Prezidenti Frank-Valter Ştaynmayer ilə mətbuata bəyanatında Azərbaycanın və Ermənistanın sülhün əldə edilməsində mövqelərinin bir-birinə kifayət qədər yaxınlaşdığını bildirib. 

Prezidentlər mətbuata bəyanatlarla çıxış etdilər - FOTOLAR (YENİLƏNİB)

Dövlət başçısı sülh müqaviləsinin mətninin 17 paraqrafdan ibarət olduğunu və tam razılaşdırıldığını deyib:

"Azərbaycan burada hər hansı bir əlavə şərt irəli sürmür. Bizim şərtlərimiz Ermənistan üçün bəllidir, yenilik deyil. Bu şərtləri biz uzun müddət ərzində irəli sürürük. Ancaq Ermənistandan bu günə qədər hər hansı bir ciddi cavab almamışıq. Nədən ibarətdir bu? Birinci, ATƏT-in Minsk qrupu ləğv edilməlidir.

İkinci məsələ Ermənistanın konstitusiyası ilə bağlıdır. Ermənistan konstitusiyasında Ermənistan müstəqillik aktına istinad var. O konstitusiyanın tərkib hissəsidir. Orada isə Azərbaycanın hüquqi, tarixi ərazisi Ermənistanla birləşməsi haqqında müddəa var və bu, bizə qarşı açıq ərazi iddiası sayılır. Ona görə Ermənistan konstitusiyasından bu bəndin çıxarılması bizim legitim tələbimizdir. Bu iki şərt təmin olunandan sonra sülh müqaviləsini imzalanmaq üçün heç bir maneə olmayacaq. Necə deyərlər, top Ermənistanın tərəfindədir. Əgər Ermənistan doğurdan da sülh müqaviləsini imzalamaq istəyirsə, Azərbaycanın bu iki legitim şərtini qəbul etməlidir", - deyə Prezident İlham Əliyev əlavə edib.

Ermənistan Respublikasının ədliyyə naziri Srbuhi Qalyan isə bu gün mətbuata verdiyi açıqlamasında bildirib ki, konstitusiyanın yeni mətni üzərində işləyirlər. O, bu prosesin 8-10 aydan tez başa çatmayacağını vurğulayıb.

Məsələ ilə bağlı "Unikal"a açıqlama verən politoloq Qabil Hüseynli bildirib ki, Ermənistanın konstitusiyasının dəyişdirilməsi doğrudan da, ciddi işdir:

"Açıq desək, ermənilər son zamanlarda bir çox məsələlərdə bizi başa düşüblər. Həmçinin bu məsələdə də şərtimizin həyata keçirilməsi üçün addımlar atmağa başlayıblar. Onlar maksimum müddət kimi götürüb 8-10 ay deyirlər, amma gecə-gündüz işləsələr, 5-6 ay ərzində konstitusiya layihəsinin mətnini hazırlaya bilərlər.

Dünənə qədər azərbaycanlının oturduğu kənddə bu gün onlar yaşaya bilməzlər"  - Qabil Hüseynli - Unikal.az

Bundan sonra, onlar referendum da keçirməlidirlər. Referendumun keçirilməsi də təxminən 2-3 ay vaxt aparır. Buna qədər ermənilər referendumun keçirilməsini və konstitusiyaya dəyişikliyin edilməsi işlərinin 2027-ci ilədək yekunlaşacağını bildirirdilər.

Artıq 2027-ci ildən 8-10 aylıq bir müddətə qədər eniblər. Bu, özü də çox böyük bir nailiyyətdir. Eyni zamanda, Almaniya Federativ Respublikasının Prezidenti Frank-Valter Ştaynmayerin bu məsələyə ciddi yanaşmasının nəticəsidir.

Sülh müqaviləsi imzalandıqdan sonra Ermənistan və Azərbaycan arasında delimitasiya və demarkasiya işləri də davam etdirilə bilər", - deyə Q.Hüseynli qeyd edib.

Murad İbrahimli