AZTV sədri Arif Alışanov və onun ailə üzvlərinə qarşı sui-qəsddə təqsirləndirilən Şücaət Əkbərov, Qoçalı Cəbiyevin, Zöhrab Şirinovun, Aqşin Hüseynovun barələrindəki cinayət işi üzrə məhkəmə davam edib.
Unikal.org-un məlumatına görə, Bakı Ağır Cinayətlər Məhkəməsində hakim Əfqan Hacıyevin sədrliyi ilə keçirilən prosesdə təqsirləndirilən Aqşin Hüseynovun vəkili Gülşən Salmanova çıxış edərək müvəkkili barəsində azadlıqdan məhrum etmə ilə bağlı olmayan cəza verilməsini tələb edib.
O bildirib ki, cinayətin üstünün açılmasında Aqşin Hüseynovun xidmətləri olub:
"Saxlandığı gündən bəri istintaqla əməkdaşlıq edib. Himayəsində iki azyaşlı uşağı var. Ailənin yeganə gəlir gətirənidir. Bunları nəzərə alınmasını və onun barəsində bəraət hökmünün çıxarılması xahiş edirik".
Gülşən Salmanovun çıxışına Şücaət Əkbərovun vəkili İmamqulu Həsənov etiraz edib.
Hər iki vəkil arasında mübahisə yaranıb. Hakim hər iki vəkili sakitləşdirib.
Aqşin Hüseynovun digər vəkili Nüşabə Ağayeva da çıxışında müvəkkili barəsində bəraət hökmün çıxarılması tələb edib: "Onun mütəşəkkil dəstənin üzvü olması nə istintaq, nə də məhkəmə dövründə sübuta yetirlməyib. Üzr istəyirəm ifadəmə görə, Aqşin buyruq qulu olub. Kim ona nə deyib, o edib. O silahın nə üçün lazım olduğundan heç xəbəri olmayıb. Məhkəmədə və istintaqda hüquq mühafizə orqanları ilə əməkdaşlıq edib. Bunların nəzər alınması xahiş edirik".
Daha sonra prosesdə Qoçəli Cəbiyevin vəkili müdafiə çıxışı edərək bildirib ki, müvəkkilinin böyrək çatışmamazlığı var. Məhkəmədəki ilkin ifadəsindən imtina edib, ona bəraət hökmünün verilməsini tələb edirik".
Şücaət Əkbərovun vəkili İmamqulu Həsənov da çıxış edərək müvəkkili barəsində verilən ittihamların heç birinin məhkəmə dövründə sübuta yetirməyini deyib.
Vəkil sonda müvəkkili barəsində heç bir ittihamı sübuta yetirmədiyi əsas gətirək barəsində bəraət hökmünün çıxarılmasını istəyib.
Məhkəmənin növbəti iclası iyulun 17-nə təyin edilib.
Xatırladaq ki, prokuror Fərid Nağıyev çıxış edərək Şücaət Əkbərovun 18 il, Qoçali Cəbiyev 16 il Zöhrab Şirinov 17 il və Aqşin Hüseynov 6 il müddətinə azadlıqdan məhrum edilməsini tələb edib.
Prokuror həmçininn Ş.Əkbərovun özü, keçmiş həyat yoldaşı və qızının adına olan bir sıraəmlakların müsadirə olunmasını və Alışanova dəymiş ziyanın ödənməsinə yönəldilməsini istəyib.
İttihama görə, Ş.Əkbərov 2013-cü ilin iyul ayından 2017-ci ilin yanvarınadək Şamaxı rayonunda və Baki şəhərində külli miqdarda özgə əmlakını aldatma və etibardan sui-istifadə yolu ilə ələ keçirmək məqsədilə dələduzluq edərə mütəşəkkil dəstə yaradıb, qanunsuz olaraq silah, döyüş sursat əldə edib, sifarişlə iki və daha çox şəxsi qəsdən öldürməyə cəhd edib. O, A.Alışanovun 4 milyon 641 min 696 manatlıq əmlakını ələ keçirmək istəyib.
S.Əkbərov yaxın münasibətlərdə olduğu Musabi Namazov, Qoçali Cəbiyev , onun vasitəsi ilə isə Zöhrab Şirinov ilə A.Alışanovu öldürmək barədə razılığa gəlib, cinayət planını hazırlayıb və mütəşəkkil dəstəyə rəhbərlik edib. Bunun müqabilində dəstə üzvləri Q.Cəbiyevlə M.Namazova 600 min manat pul verəcəyini vəd edib.
2016-cı ilin dekabr ayının 13-də Şamaxı rayonunun Mədrəsə qəsəbəsindəki evinə gələcəyini qabaqcadan bildiyi A.Alışanovu, onun qızı Nigar Alışanovanı və sürücüsü Hacı Babayevi öldürməsini sifariş verib.
Lakin sonradan dəstə üzvü M.Namazov bu cinayətdən könüllü olaraq imtina edib.
Ş.Əkbərov 2016-cı ilin dekabr aylarında A.Alışanovu qəsdən öldürmək məqsədilə başqa şəxs tapmaq barədə dəstə üzvü Q.Cəbiyevə yenidən tapşırıq verib. Q.Cəbiyev əvvəllər məhkum olunmuş, tanışı Z.Şirinovla cinayəti törətmək məqsədi ilə 100 min manat qarşılığında razılığa gəlib. Bir qədər sonra A.Alışanovun, onun bacısı oğlu Dəyanət Cəfərovun içərisində olduğu "Toyota land Cruiser markalı 99-AA- 400 dövlət nömrə nişanlı avtomaşını Çuxuryurd- Şamaxı şossesi yolunda hərəkətdə olarkən yüksək sürətdə vuraraq hündürlükdən dərəyə salmaq barədə plan hazırlanıb.
Q.Cəbiyev telefonla Z.Şirinova zəng edib, cinayətin törədiləcək vaxtı, A.Alışanovun içərisində olacağı avtomaşını markası, rəngi, dövlət nömrə nişanlı barədə məlumatlandırıb.
Lakin A.Alışanov gözlənilmədən öz avtomaşınına deyil, VAZ 21214 "NİVA markalı, 10-LR-099 dövlət nömrə nişanlı avtomaşına əyləşib və Ş.Əkbərov bu barədə dəstə üzvləri Q.Cəbiyev və Z.Şirinovu xəbərdan etməyə imkan tapmayıb.
Plana əsasən, Q.Cəbiyev Çuxuryurd kəndindən keçib Şamaxı şəhərinə doğru hərəkət edən "Toyota Land Cruiser markalı avtomaşını özünün idarə etdiyi VAZ 21214 "NİVA markalı avtomaşınla bir neçə dəfə arxa sol və orta hissəsindən vuraraq yüksəklikdən dərəyə salmağa çalışsa da, buna nail ola bilməyərək idarəetməni itirib.
S.Əkbərov qəsdən adam öldürmə cinayətinin icrası üçün qrup üzvlərinə vəd etdiyi 100 min manat pulun bir hissəsini Z.Şirinova verib. Təqsirləndirilən şəxs 2017-ci ilin yanvar ayının 11-də növbəti dəfə A.Alışanovu Şamaxı rayonunda odlu silahdan istifadə etməklə qəsdən öldürmək qərarına gəlib.
Lakin yenə planları baş tutmayıb. Ş.Əkbərov sürücüsü Aqşin Hüseynov və mütəşəkkil dəstənin üzvü Q.Cəbiyev vasitəsilə avtomat silahı Z.Şirinovdan geri alaraq, yenidən A.Alışanovla Şamaxı rayonunun ərazisində görüşəcəkləri barədə razılığa gəlib. Həmin gün Şamaxı rayonunun Mədrəsə qəsəbəsində yerləşən su hovuzuna baxmağa apararkən odlu silahlardan atəşlər açmaqla qəsdən öldürmək barədə dəstə üzvləri Q.Cəbiyev, M.Namazov və Z.Şirinovu təlimatlandırıb.
M.Namazov dəstə üzvləri tərəfindən törədiləcək qəsdən adam öldürmə və qanunsuz silah əldə etmə daşıma, gəzdirməklə saxlama əməlləri barədə polis orqanlarına vaxtında məlumat verib. Polis əməkdaşları Ş.Əkbərovu, Q.Cəbiyevi, A.Hüseynovu və Z.Şirinovu saxlayıb.
Məhkəmənin qərarı ilə Ş.Əkbərov, Q.Cəbiyev, A.Hüseynov və Z.Şirinovun barəsində həbs qətimkan tədbiri seçilib.
