"Ötən il sentyabr ayının 27-də başlanan və 44 gün davam edən Vətən Müharibəsində Azərbaycan parlaq qələbə qazandı. Əlbəttə ki, bu qələbəni Prezident İlham Əliyevin qurduğu düzgün siyasət nəticəsində əldə etmək mümkün oldu".

Bunu Unikal.org-a açıqlamasında Millət vəkili Cavid Osmanov deyib:

"Döyüş meydanında Ermənistan silahlı qüvvələri darmadağın edildi. Bununla da Azərbaycan bütövlükdə erməni faşizmi üzərində qələbə qazandı. Ölkə Prezidenti İlham Əliyev bütün müstəvilərdə, həmçinin informasiya və diplomatik sahələrdə də erməni lobbisinə qalib gəlməyi bacardı. Rəşadətli ordumuz isə Ermənistanı döyüş meydanında darmadağın etdi.

İmzalanan üçtərəfli bəyanatdan sonra Ağdam, Kəlbəcər və Laçın rayonları heç bir güllə atmadan, heç bir şəhid vermədən Azərbaycana qaytarıldı. Azərbaycan ərazi bütövlüyünü təmin etdi. Ermənistan terrorçu və seperatçı siyasətini davam etdirməklə vaxtilə işğal etdikləri ərazilərdə minalar basdırmış və bu minaların xəritəsini bügunə kimi Azərbaycana təqdim etməmişdir.

Azərbaycan dövləti öz gücü hesabına həm minalardan təmizləmə işlərini sürətlə aparır, eyni zamanda da işğaldan azad olunmuş ərazilərin bərpası və yenidənqurulması işlərinə başlamışdır. Azərbaycanın yaratdığı yeni reallığı bütün dünya qəbul edir. Dünya liderləri Azərbaycana daha böyük hörmətlə yanaşırlar. Bütün bunları bəxş edən Prezident İlham Əliyev olub. Ötən gün isə iki jurnalistimiz, və icra nümayəndəsinin müavini minaya düşərək həlak olmuşlar, bəzi insanlar da ağır yaralanmışdır.

Bu, birinci hal deyil. Artıq bir neçə dəfə baş vermişdir. Bütün dünya bununla bağlı Ermənistana təzyiq göstərməlidir. Eyni zamanda çox təəssüf hissi ilə qeyd etmək istəyirəm ki, Arif Hacılı öz sosial şəbəkə hesabında status yazaraq bütün bunların günahını Azərbaycan hakimiyyətinin üzərinə yıxmağa çalışır. Əslində, bu, çox absurd bir haldır. Vətən Müharibəsində Azərbaycan xalqı heç vaxt birləşmədiyi kimi birləşməsinə və parlaq Qələbəmizə kölgə salmaq niyyətini daşıyır.

Arif Hacılı belə statuslar yazmamışdan əvvəl özü başa düşməlidir ki, onların hakimiyyəti dövründə Azərbaycan torpaqları 20 faiz işğala məruz qaldı. Azərbaycan xalqına qarşı törədilən soyqırımlar məhz xəyanəti, səriştəsizliyi onların ucbatından oldu. Onlar öz məkrli siyasəti üçün, öz niyyətləri üçün, hakimiyyətə gəlmək üçün min bir oyundan çıxdılar, xəyanət etdilər, saxtakarlıq etdilər. Belə bir status yazmaqla özünü dırnaqarası qəhrəman kimi göstərməyə çalışan Arif Hacılı Qələbəmizə kölgə salır. Əlbəttə ki, bu, qəbuledilməzdir. Arif Hacılı kimilər yaxşı başa düşməlidirlər ki, Azərbaycan tarixində heç zaman əldə etmədiyi, qazan bilmədiyi böyük Qələbə qazanıb.

Bölgədə yaranan yeni reallıq artıq dünyaya sıçrayan bir reallıqdır. Belə statusları yazarkən onlar qayıdıb tarixə baxsınlar və 1990-cı illərin əvvəllərində onların törətdikləri əməllər, xəyanətkarlıq, səriştəsizlik misyalarını bir daha gözlərinin önündən keçirsinlər.

Bizim daha da sıx birləşməli olduğumuz bir vaxtda belə yalnış fikirlər qəbul edilməzdir. Heç kimdə şübhə yoxdur ki, işğaldan azad edilən ərazilərimiz dünyanın ən gözəl, cənnət kimi məkanlarından birinə çevriləcəkdir. Bir milyondan çox məcbur köçkünlərimiz, qaçqınlarımız öz dədə-baba torpaqlarına qayıdacaqlar. Bunun üçün ölkə Prezidentinin öz qətiyyətli siyasi iradəsi var. Qüdrətli və güclü Azərbaycan İlham Əliyevin rəhbərliyi ilə qurulub və bundan sonra da inkişaf edəcək".

Murad İbrahimli