Gəncədə 35 yaşlı şəxs qətlə yetirilib, cinayət işi açılıb.

Bu barədə "Unikal"a Gəncə Şəhər Prokurorluğundan məlumat verilib.

Bildirilib ki, iyunun 28-si, saat 11 radələrində Gəncə şəhəri, N.Nərimanov prospektində yerləşən iaşə obyektlərindən birində 1986-cı il təvəllüdlü Kamil Cəfərovun kəsici-deşici xəsarətlərdən ölməsi barədə şəhər prokurorluğuna məlumat daxil olub.

Prokurorluq əməkdaşları tərəfindən hadisə yeri və meyit müayinə olunmaqla digər prosessual hərəkətlər aparılır.

Fakta görə Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

"Cinayət əməlini törətməkdə şübhəli bilinən şəxsin məsuliyyətə cəlb olunması istiqamətində zəruri tədbirlər davam etdirilir. Nəticəsi barədə əlavə məlumat veriləcək", - məlumatda qeyd edilib.

***11:47

Gəncədə baş verən qətlin söyüş üstündə baş verdiyi məlum olub. 

"Unikal"ın məlumatına görə, qətl şəhərdəki kafelərdən birində qeydə alınıb. İlkin məlumata görə, tərəflər arasında söyüş üstündə mübahisə düşüb. Elə bundan sonra qətl hadisəsi baş verib. Hər iki şəxsin hadisə vaxtı sərxoş olduğu bildirilir.

Tural Əhmədov

***11:39

Gəncədə 35 yaşlı şəxs qətlə yetirilib.

Bu barədə "Unikal"a Daxili İşlər Naziliyinin Mətbuat Xidmətinin Gəncə regional qrupunun baş inspektoru polis kapitanı Eşqin Qasımov deyib.

Bildirilib ki, Gəncə Şəhər Baş Polis İdarəsinin 4-cü Polis Bölməsinə şəhər ərazisində 1 nəfərin bıçaq xəsarətləri ilə qətlə yetirilməsi barədə məlumat daxil olub. Dərhal Baş Polis İdarəsinin və Şəhər Prokurorluğunun əməkdaşları hadisə yerinə gələrək müvafiq araşdırmalar aparıb.

İlkin araşdırmalar nəticəsində məlum olub ki, Şəmkir rayon sakini 1988-ci il təvəllüdlü Kamil Cəfərov aldığı çoxsaylı bıçaq xəsarətləri ilə qətlə yetirilib.

Polis əməkdaşlarının keçirdikləri təxirəsalınmaz əməliyyat-axtarış tədbirləri nəticəsində qətli törətməkdə şübhəli bilinən Zəngilan rayon sakini, 2004-cü il təvəllüdlü Samir Hüseynov saxlanılaraq istintaqa təhvil verilib.

Faktla bağlı araşdırmalar davam etdirilir.