Azərbaycanın 2030-cu ilə qədər sosial-iqtisadi inkişafa dair beş milli prioritetindən biri “Təmiz ətraf mühit və yaşıl artım ölkəsi” kimi müəyyən edilib. Həmin prioritetə uyğun olaraq, ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində işlər aparılır.

"Unikal" xəbər verir ki, bu işlərin davamı olaraq  Prezident İlham Əliyev tərəfindən 2024-cü il “Yaşıl dünya naminə həmrəylik ili” elan edilib. Neftçala rayonunda da “Yaşıl dünya naminə həmrəylik ili”nə həsr olunan silsilə tədbirlər keçirilir.
Tədbirlər çərçivəsində Neftçala rayonu ərazisindən keçən magistral avtomobil yollarının kənarlarında rayon icra hakimiyyəti tərəfindən payız mövsümündə ağacəkmə aksiyalarının keçirilməsinə start verilib.
Aksiyada Neftçala Rayon İcra Hakimiyyətinin başçısı Mirhəsən Seyidov, RİH-in əməkdaşları, Yerli İnzibati Ərazi dairəsi üzrə nümayəndələr, bələdiyyələr, idarə, müəssisə və təşkilatların, Neftçala MKTB-in əməkdaşları, könüllülər, ictimaiyyət nümayəndələri iştirak edib.
Ələt-Astara magistral avtomobil yolunun kənarında 1200 ədəddən çox müxtəlif növ ağaclar əkilib, onlara aqrotexniki qulluq göstərilib.
“Yaşıl Dünya naminə həmrəylik ili” çərçivəsində  payız mövsümündə rayon ərazisində yaşıllıqların artırılması məqsədilə 10 000 ədəd ağacın əkilməsi, abadlıqla bağlı tədbirlərin davam etdirilməsi nəzərdə tutulur.