Mikayıl Cabbarov xüsusi təhsil məsələləri barədə əmr imzalayıb

Mikayıl Cabbarov xüsusi təhsil məsələləri barədə əmr imzalayıb

Təhsil Nazirliyi orta məktəblərdə müəllimlərin dərs saatının artırılması ilə bağlı bəzi müəllimlərdə yaranan anlaşılmazlığa da aydınlıq gətirdi

Təhsil naziri Mikayıl Cabbarov xüsusi təhsil məsələləri barədə əmr imzalayıb. Təhsil Nazirliyinin mətbuat xidmətindən verilən xəbərə görə, imzalanmış əmrlə xüsusi, inteqrasiyalı və inklüziv təhsil üzrə elmi-tədris-metodiki rəhbərlik De-institutlaşma və Uşaqların Müdafiəsi İdarəsinə həvalə olunub.
Əmrdə De-institutlaşma və Uşaqların Müdafiəsi İdarəsinin Sosial işin təşkili və statistika şöbəsinin adı dəyişdirilərək, Xüsusi təhsil şöbəsi adlandırılıb, Sosial işin təşkili və statistika şöbəsinin funksiyaları isə İdarənin Dövlət uşaq müəssisələri və alternativ xidmətlər üzrə şöbəsinə verilib.
Respublika Psixoloji-Tibbi-Pedaqoji Komissiyası 1 ay müddətində 2012-2014-cü illər ərzində fəaliyyət istiqamətləri üzrə görülmüş işlər barədə Təhsil Nazirliyinə hesabat təqdim etməlidir.
De-institutlaşma və Uşaqların Müdafiəsi İdarəsinə 3 ay müddətində xüsusi təhsilin təkmilləşdirilməsi, o cümlədən psixoloji-tibbi-pedaqoji komissiyasının tərkibinə dair təkliflərini rəhbərliyə təqdim etmək, İnformasiya şöbəsinə isə əmrin surətinin Nazirliyin bütün struktur bölmələrinə çatdırılmasını, "Azərbaycan müəllimi" qəzetində dərc olunmasını və Nazirliyin internet saytında yerləşdirilməsini təmin etmək tapşırılıb. Əmrin icrasına nəzarət Aparat rəhbəri M. Eynullayevə həvalə olunub.
Bundan əlavə, Azərbaycan Təhsil Nazirliyi orta məktəblərdə müəllimlərin dərs saatının artırılması ilə bağlı bəzi müəllimlərdə yaranan anlaşılmazlığa aydınlıq gətirib. Təhsil Nazirliyinin insan resursları şöbəsinin müdir müavini İlham Nağıyev Trend-ə deyib ki, bilik və bacarıqlarının diaqnostik qiymətləndirməsi aparılan müəllimlərin orta dərs yükü 18 saata kimi qaldırıldı: "Lakin bəzən müəyyən müəllimlər dərs saatının artırılmasını səhv anlayırlar. Onlar bu artımın hansısa müəllimin işdən çıxarılması hesabına baş tutması kimi qəbul edirlər. Amma bu, işdən çıxarılma hesabına olmur. Sadəcə olaraq, yaş həddinə çatmış müəllimlər işdən çıxarıldıqda onların yerinə yeni müəllim işə götürülmür. Onun dərs saatı digər fənn müəllimləri arasında bölüşdürülür. Belə müəllimlərin sayı da az olmur".
TN səlahiyyətlisi diaqnostik qiymətləndirmənin aparılması üçün iki mühüm meyarın nəzərə alındığını söyləyib. Onun sözlərinə görə, bu meyarların birincisi, müəllim-şagird nisbətinin müvafiq qaydaya salınması, ikincisi isə müəllimlərin orta dərs yükü amilidir: "Bakıda diaqnostik qiymətləndirmə keçirilənə kimi olan son iki ili müqayisə etsək görərik ki, bu sahələrdə kifayət qədər ciddi iş görülüb. Bakıda həm şagird-müəllim nisbəti tənzimləndi, həm də müəllimlər üçün orta dərs yükü 18 saata kimi qaldırıldı".
İ.Nağıyev onu da əlavə edib ki, yay ayı ərzində Azərbaycanın daha 7 rayon və şəhərində müəllimlərinin bilik və bacarılqarının diaqnostik qiymətləndirilməsi aparıla bilər: "Artıq 7 rayon və şəhərdə müəllimlərinin bilik və bacarılqarının diaqnostik qiymətləndirməsinin aparılması üçün Nazirlər Kabinetinə müraciət edilib. Əgər hökumətdən müvafiq cavab gələrsə, ölkənin 7 rayon və şəhərində yay ayı rəzində qiymətləndirilmənin keçirilməsi mümkündür. Yayda keçirsək, bunu yayın sonuncu dövründə etməyi planlaşdırırıq. Həmin yerlərdə diaqnostik qiymətləndirmə müəllimlərin işə qəbulu imtahanından sonra olsun ki, həmin regionlarda işləyəcək yeni işə qəbul olan müəllimlərə də müvafıq həvəsləndirmə tədbirləri tətbiq olunsun".
İ.Nağıyev bildirib ki, diaqnostik qiymətləndirmənin keçirilməsi üçün həmin regionun da buna hazır olması lazımdır: "Yalnız bu hazırlıq təmin olunduqdan sonra həmin regionda diaqnostik qiymətləndirmə keçiriləcək".
Xatırladaq ki, Azərbaycanda dərs bölgüsü aparılarkən müəssisədə işləyən müəllim üçün həftəlik bir stavka dərs yükü 12 saat müəyyənləşdirilir. Bilik və bacarıqlarının diaqnostik qiymətləndirilməsi keçirilmiş müəllimlərin dərs bölgüsü aparılarkən isə müəllim üçün həftəlik 1 stavka dərs yükü 18 saat müəyyənləşdirilməlidir. Ancaq bu zaman həftəlik dərs yükü 2 stavkadan çox olmamalıdır.
Toğrul