Cəlilabadda toydan sonra vay
23 yaşlı oğlan xəyanətə qurban getdi
Cəlilabad rayon sakini, 1988-ci il təvəllüdlü Elman Həsənov qısqanclıq zəminində həmyerilisi, 23 yaşlı Həbib Şahbazovu bıçaqla öldürüb.
Elman Həsənov həyat yoldaşı Firuzənin Həbiblə intim münasibətdə olmasından şübhələnib.
2014-cü il sentyabrın 9-da, saat 23 radələrində Elman Həsənov yaşadığı Maşlıq kəndində toy məclisində olub. Toyda Həbib də iştirak edib. Amma sonradan məclisi yarımçıq tərk edib.
Yataq otağında tutdu
Həbibin toyda olmadığını görən Elman Həsənov onun həyat yoldaşı Firuzə ilə intim əlaqədə olmaq üçün evinə getdiyini fikirləşib. Bu səbəbdən Elman tələm-tələsik toydan çıxıb və evinə gedib. Evə gələn Elman Həbibi öz yataq otağında görüb.
O, Həbibdən onun evinə niyə gəlməsinin səbəbini soruşub. Bu zaman onların arasında mübahisə yaranıb. Elman mübahisə zamanı bir daha Həbibin onun arvadı ilə intim münasibəti olmasına əmin olub. Buna görə də Həbibi öldürmək qərarına gəlib.
Qanlı cinayətin
acı sonluğu
Elman yataq otağında olan dolabın altına qoyduğu bıçağı götürərək Həbib Şahbazova yüngül bıçaq xəsarətləri yetirib. Daha sonra Həbibi yataq otağından çıxarıb. Səs-küyə digər otaqdan Elmanın anası Mehparə gəlib.
Daha sonra Həbib Şahbazovun qonşuluqda yaşayan bacısı Səliqə Şahbazova və həyat yoldaşı Babək Niftullayev də hadisə yerinə gələrək cinayətin qarşısını almağa cəhd ediblər. Elman isə ürəyi soyumadığından Həbibə daha bir neçə bıçaq zərbəsi endirib.
Köməyə gələnləri öldürməklə hədələdi
Elman onu sakitləşdirməyə çalışanlara Həbib Şahbazovun ölməli olduğunu söyləyib. Elman Həsənov Həbibə ilkin tibbi yardım göstərməyə can atan bacısı Səliqə Şahbazova və Babək Niftullayevi də öldürəcəyi ilə hədələyib.
Üç maddəlik cinayət işi
Bu əməlinə görə Elman Həsənov Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə), 134-cü (öldürməklə və ya sağlamlığa ağır zərər vurmaqla hədələmə) və 228.4-cü (qanunsuz olaraq qaz silahını, soyuq silahı, o cümlədən tullayıcı silahı əldəetmə, satma və ya gəzdirmə, milli geyim ləvazimatı hesab olunan ərazilərdə və ya ovçuluq peşəsi ilə bağlı olaraq soyuq silahı gəzdirmə) maddələri ilə ittiham olunub.
Cinayət işinin materialları baxılmaq üçün Lənkəran Ağır Cinayətlər Məhkəməsinə göndərilib. Cinayət işi hakim Xamməd Nuriyevin sədrlik etdiyi kollegiyada araşdırılıb.
"Məni də öldürəcəyi ilə hədələdi"
Zərərçəkmiş şəxs qismində dindirilən Səliqə Şahbazova bildirib ki, sentyabrın 9-da, axşam saat 23 radələrində qonşusu Mehparə Həsənova onun yaşadığı evə gələrək oğlu Elmanın Həbiblə savaşdığını deyib: "Həyat yoldaşım Babəklə birlikdə Mehparəgilin evinə keçdik. Eyvanda Elman Həsənovun əlində bıçaq Həbibin yaxasından yapışdığını gördüm. Qardaşımı Elmanın əlindən almaq istəsəm də, Elman bıçağı mənə tərəf tuşlayaraq köməyə gələnləri də öldürəcəyi ilə hədələdi. Lakin heç nəyə baxmadan Elmana yaxınlaşdım və Həbibi onun əlindən alaraq stula oturtdum".
"Həbibin buradan ancaq ölüsü çıxa bilər"
Zərərçəkmiş şəxsin sözlərinə görə, Elman onu bıçaqla vurmaq istəyib: "Babək buna mane olmaq istəsə də, Elman Həbibin üstünə cumaraq bıçaqla onun sinəsindən zərbə endirməyə müvəffəq oldu. Babək qonşuluqda yaşayan bibisi oğlu Mehdiyə zəng vuraraq tez gəlməsini xahiş etdi. Daha sonra o, dayısı oğlu Mənsurgilə gedərək ondan Həbibi avtomobillə xəstəxanaya çatdırmağı xahiş etdi. Babək həyətdən çıxandan sonra Mehparənin qardaşı (Elmanın dayısı) Eldəniz də oraya gəldi. Bir az sonra Babək Mənsur və Mehdi ilə birlikdə Elmangilin həyətinə qayıtdı. Gələnlər Həbibi tez xəstəxanaya çatdırmaq istəsələr də, Elman "Həbibin buradan ancaq ölüsü çıxa bilər, heç kim onu xəstəxanaya apara bilməz" dedi. Onu xəstəxanaya aparmağa qoymadığından, Həbib oradaca keçindi. Bu zaman Mehdi Elmanın üstünə gedərək onu qucaqlayaraq eyvandan çıxardı. Ancaq bundan sonra Həbibin ölüsünü Mənsurun maşını ilə xəstəxanaya apardıq".
Hakim heyəti cinayət işinin dəlillərini araşdırandan sonra Elman Həsənovu 16 il müddətinə azadlıqdan məhrum edib.
Hacı Zeynalov
