Bu gün saat 20:30 radələrində Fövqəladə Hallar Nazirliyinin "112" qaynar telefon xəttinə Bakı şəhəri, Nərimanov rayonu, Məmməd Araz küçəsində yerləşən oteldə yanğın baş verməsi barədə məlumat daxil olub.

"Unikal" xəbər verir ki, bu barədə Fövqəladə Hallar Nazirliyi məlumat yayıb.

Məlumatla əlaqədar dərhal nazirliyin Dövlət Yanğından Mühafizə Xidmətinin yanğından mühafizə bölmələri çağırış üzrə cəlb olunub.

Hadisə yerində əməliyyat şəraiti qiymətləndirilərkən müəyyən olunub ki, yanğın yeddimərtəbəli otel binasının dam örtüyü və liftin şaxtasında liftlərin mühərriklərinin yerləşdiyi bölmədə baş verib. 

Yanğınsöndürmə qüvvələrinin operativ müdaxiləsi sayəsində yanğın qısa müddətdə söndürülərək geniş əraziyə yayılmasına imkan verilməyib. Yanğın nəticəsində təqribən 100 kv m sahə yanıb, otelin binası yanğından mühafizə olunub.

xxx

20:55

Bakıda hotel yanır.

"Unikal"ın məlumatına görə, Nərimanov rayonunda milyonerlər məhəlləsi kimi tanınan küçədə "Ramada" adlı hoteldə yanğın başlayıb.

Hazırda Məmməd Araz küçəsində yerləşən hoteldə başlayan yanğının söndürülməsi istiqamətində FHN əməkdaşları tərəfindən işlər görülür.

Qeyd edək ki, sözügedən hotel tanınmış iş adamı Hafiz Məmmədovundur və pul borcu müqabilində bankda girovluqda idi. Bu səbəbdən də hotel bir müddətdir ki, işləmir.

Ağarza Elçinoğlu