“Partlayış haqqında məlumat bu gün Fövqəladə Hallar Nazirliyinin 112 zəng mərkəzinə, eyni zamanda Dövlət Yanğından Mühafizə Xidmətinin 101 mərkəzinə saat 15:53-də daxil olub”.

"Unikal" xəbər verir ki, bunu Dövlət Yanğından Mühafizə Xidmətinin rəis müavini Əkbər Novruzov hadisə yerində jurnalistlərə açıqlamasında deyib: “Partlayış nəticəsində hündürmərtəbəli yaşayış binasının sonuncu mərtəbəsində yerləşən bütün mənzillər dağılıb, bir nəfər həlak olub, 2 nəfər isə yaralanıb. Partlayışın baş vermə səbəbləri ilə bağlı həm FHN-in, həm də hüquq-mühafizə orqanlarının əməliyyat istintaq qrupları hadisə yerində təhqiqat işləri aparır. Aşağı mərtəbədə bir mənzilin qapısı, eləcə də liftlərin qapıları tamamilə sıradan çıxıb, təxliyə yollarında pilləkən qəfəslərində çatlar əmələ gəlib”.

Əkbər Novruzov qeyd edib ki, partlayışın hansı mənzildə baş verdiyini demək hazırda çətindir: “Çünki bütün mənzillər dağılıb. İstintaqdan sonra partlayışın dəqiq harda baş verdiyi məlum olacaq. Bizdə olan məlumata görə, zərbə dalğası bir nəfəri aşağı atıb. Böyük ehtimalla həmin şəxs partlayış baş verən mənzildə olub. Həmin mənzilin hansı olduğu isə istintaq yolu ilə müəyyənləşdiriləcək. Həm bizim əməkdaşlarımız, həm də digər əlaqədar şəxslər binada çalışır. Yanğınsöndürənlərimiz dağıntıları təmizləməklə məşğuldur”.