Taylandın Koh Samui şəhərində döyüş gecəsi  baş tutub.  "Night Super Fight" adlı reytinq matçında Azərbaycanın kikboks üzrə milli komandasının qadın üzvü Nehir Rəcəbzadə də  iştirak edib və qalib olub.   Onun rəqibi 51 kq çəki dərəcəsində taylandlı idmançı olub

Nehir Rəcəbzadə Unikal.org-a açıqlamasında yarışa təsadüfən çıxdığını deyib:

"Biz Taylanda Bəhramla birlikdə məşq üçün getmişdik. Orada olarkən mənim üçün döyüşə çıxmaq təklifi gəldi və qəbul etdik. Təbii ki, bu yarışın pul mükafatı vardı. Şükürlər olsun ki, qalib olduq. Qarşıda bizi yarışlar gözləyir. Amma yaxın zamanda WAKO üzrə dünya çempionatı keçiriləcək, orada iştirakım planlaşdırılır".  

Qeyd edək ki, Nehir azərbaycanlı ailəsinə gəlin köçmüş türkiyəli idmançıdır. O əslən cənubi Azərbaycandan olan "Altın Qurd" ləqəbli tanınmış kikboksçu, dünya çempionu Bəhram Rəcəbzadənin həyat yoldaşıdır. Bəhram və Nehir Rəcəbzadələr Azərbaycanda kikboks üzrə yığmanın üzvləridir. Hər ikisi beynəlxalq yarışlarda Azərbaycan bayrağını dalğalandırırlar.

Xatırladaq ki, Bahram Rəcəbzadə bu yaxınlarda dünyanın ən böyük peşəkar təşkilatı "Glory" ilə müqavilə imzalayıb.