İrandan Azərbaycan ərazisinə qaçaqmalçılıq yolu ilə külli miqdarda narkotik vasitə və psixotrop maddəni keçirərək satışında təqsirləndirilən Elşad Əliyev və Zakir Nağıyevin cinayət işi üzrə məhkəmə prosesi başlayıb.

"Unikal"ın məlumatına görə, Bakı Ağır Cinayətlər Məhkəməsinin hakimi Səbuhi Hüseynovun sədrliyi ilə keçirilən prosesdə dövlət ittihamçısı Orxan Kəngərli ittiham aktını elan edib.

İstintaqla müəyyən edilib ki, Elşad Əliyev tanışı Zakir Nağıyevlə birgə satış məqsədi ilə qanunsuz olaraq külli miqdarda narkotik və psixotrop maddəni İran vətəndaşı olan "Rəsul" adlı şəxslə cinayət əlaqəsinə girib. Razılaşmaya əsasən onlar İran vətəndaşı  "Rəsul" adlı şəxsdən 40 000 manat məbləğində pul təklifi və təlimatı əsasında gələcəkdə ayrı-ayrı müştərilərə çatdıracaq.

Onlar Azərbaycanın gömrük sərhədindən gömrük nəzarətindən kənar və yandan gizli keçirərək 170 kq narkotik və psixotrop maddələri Sumqayıt şəhəri, Yaşma bağları ərazisində dənizin sahilində yerləşdiriblər.

Daxili İşlər Nazirliyinin Baş Narkotiklərlə Mübarizə İdarəsinin əməkdaşları tərəfindən həyata keçirilmiş əməliyyat-axtarış tədbiri nəticəsində Elşad Əliyev və Zakir Nağıyev 2023-cü ilin mayında saxlanılıblar. Aparılan şəxsi axtarış və götürmə zamanı 170 kq-dan artıq narkotik və psixotrop maddələr ələ keçirilib.

Hər iki şəxsə qarşı Cinayət Məcəlləsinin  206.3.2-ci (Azərbaycan Respublikasının dövlət sərhədini qanunsuz olaraq keçmə), 234.4.1 vǝ 234.4.3-cü (qanunsuz olaraq narkotik vasitələri, psixotrop maddələri əldə etmə, saxlama, daşıma, göndərmə və ya satma) maddələri ilə ittiham irəli sürülüb.

Seymur Əli