Baş Prokurorluq Masallı rayonunda piyadaları vuraraq hadisə yerindən qaçan sürücünün həbs olunması ilə bağlı məlumat yayıb.

Qurumun mətbuat xidmətindən unikal.org-a verilən məlumata görə, Masallı rayon Polis Şöbəsi və Masallı rayon Prokurorluğunun əməkdaşları tərəfindən həyata keçirilən istintaq-əməliyyat tədbirləri nəticəsində rayon ərazisində ölümlə nəticələnən yol nəqliyyat hadisəsini törədərək hadisə yerindən qaçmış sürücü müəyyən edilərək tutulub.

Belə ki, 24 noyabr 2016-ci il tarixdə, saat 19 radələrində Masallı rayonu, Kolatan kənd sakini Tahirov Seymur Ağaşir oğlu idarə etdiyi "Mercedes-Benz markalı, 90-CZ-584 dövlət qeydiyyat nişanlı avtomobillə rayonun Ərkivan qəsəbəsi ərazisində hərəkətdə olarkən yol hərəkəti və nəqliyyat vasitələrinin istismarı qaydalarını kobud surətdə pozaraq yolu keçən piyadalar - Əhmədov Nəsimi Əhmədağa oğlunu və Fərzəliyev Ziyafət Tarverdi oğlunu vuraraq hadisə yerindən qaçması və sonuncunun hadisə yerində ölməsində əsaslı şübhələr olduğundan faktla bağlı rayon Polis Şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə cinayət işi başlanılıb.

Aparılan təxirəsalınmaz istintaq-əməliyyat tədbirləri nəticəsində S.Tahirov tutularaq istintaqa cəlb olunub.

S.Tahirov iş üzrə təqsirləndirilən şəxs qismində cəlb olunaraq ona Cinayət Məcəlləsinin qeyd edilən maddələrində nəzərdə tutulan ittiham elan olunub və rayon məhkəməsinin qərarı ilə barəsində həbs qətimkan tədbiri seçilib.

Hazırda iş üzrə zəruri istintaq tədbirləri davam etdirilir.